Лукашэнка адзначыў вядомасць “КБ Радар” — падсанкцыйнага прадпрыемства ВПК

9 сакавіка, Позірк. За 20 гадоў ад моманту ўтварэння ААТ “КБ Радар” — кіроўная кампанія холдынгу “Сістэмы радыёлакацыі” стала прыкладам “інавацыйнага развіцця і гарантаванай надзейнасці пры распрацоўцы шырокай лінейкі высокаэфектыўных радыёэлектронных сістэм”, заявіў Аляксандр Лукашэнка, віншуючы 9 сакавіка “кіраўнікоў, работнікаў і ветэранаў” прадпрыемствы з яго юбілеем.

Віншавальнік, пасланне якога апублікавала яго прэс-служба, лічыць, што прадпрыемства “ўпэўнена трымае лідарскія пазіцыі па вытворчасці спецыяльнай тэхнікі”. На яго думку, марка “КБ Радар” з’яўляецца “прызнаным знакам якасці, вядомым далёка за межамі Беларусі”: “І ўсё гэта дзякуючы прадуманай стратэгіі, прымяненню сучасных навукаёмістых рашэнняў і найвышэйшай кваліфікацыі спецыялістаў”.

“Перакананы, што створаныя задзелы і вялікі досвед дазваляюць калектыву з упэўненасцю глядзець у будучыню, робячы годны ўнёсак ва ўмацаванне абараназдольнасці Рэспублікі Беларусь, развіццё эканомікі і падвышэнне дабрабыту народа”, — адзначыў палітык.

ААТ “КБ Радар” — кіроўная кампанія холдынгу “Сістэмы радыёлакацыі” створаная на базе спецыялізаванага канструктарскага бюро, якое дзейнічала з 1974 года. Займаецца распрацоўкай і вытворчасцю радыёлакацыйных сістэм і сродкаў радыёэлектроннай барацьбы.

Пасля поўнамаштабнага ўварвання Расіі ва Украіну 24 лютага 2022 года, якое адбылося ў тым ліку з беларускай тэрыторыі, у дачыненні да “КБ Радар” увялі санкцыі Аўстралія, Вялікабрытанія, Канада, Новая Зеландыя, ЗША, Швейцарыя, Японія, а таксама Еўрасаюз (27 краін).