14 чалавек аштрафаваныя ў Пухавіцкім раёне за продаж банкаўскіх карт махляру

27 сакавіка, Позірк. У Пухавіцкім раёне спынена схема незаконнага абароту банкаўскіх карт, паведамляецца ў тэлеграм-канале УУС Мінскага аблвыканкама.

Адзначаецца, што супрацоўнікі Пухавіцкага РАУС выявілі 14 грамадзян, якія “прадалі свае банкаўскія карты трэцяй асобе”. У выніку карты “былі выкарыстаныя як сродак плацяжу ў супрацьпраўных схемах”.

На гэтыя карткі “ажыццяўляўся перавод выкрадзеных грашовых сродкаў грамадзян”.

Такім чынам, гаворыцца ў паведамленні, жыхары раёна сталі “міжвольнымі памагатымі ў крадзяжы чужой маёмасці”.

У дачыненні да іх складзеныя пратаколы за “наўмыснае стварэнне ўмоў для здзяйснення крадзяжу”.

Дзеянні парушальнікаў кваліфікаваныя паводле арт. 12.35 КаАП. Суд прызначыў ім штрафы.

У Беларусі колькасць выпушчаных банкамі плацежных карт за 2025 год павялічылася на 3,9% (з 19.370.115 на 1 студзеня 2025-га да 20.133.113 на 1 студзеня 2026-га), вынікае з праведзенага “Позіркам” аналізу даных Нацыянальнага статыстычнага камітэта.