Двое рабочых дастаўлены ў бальніцу пасля абвальвання перакрыцця пры будаўніцтве дома ў Брэсцкім раёне
27 сакавіка, Позірк. Двое рабочых дастаўлены ў бальніцу з множнымі траўмамі пасля абвальвання пліты перакрыцця пры будаўніцтве жылога дома ў вёсцы Кавярдзякі Брэсцкага раёна, паведамляе Следчы камітэт.
Гэта адбылося ўвечары 26 сакавіка. Адзначаецца, што на месцы здарэння працавала следча-аператыўная група.
“Следчымі праведзены агляд, зафіксавана следавая карціна, апытаныя відавочцы і прызначаныя судова-медыцынскія экспертызы. У цяперашні час вывучаецца праектна-будаўнічая дакументацыя”, — гаворыцца ў паведамленні.
Супрацоўнікамі СК праводзіцца праверка. “Высвятляюцца ўсе абставіны здарэння, а таксама прычыны і ўмовы, якія прывялі да трагедыі”, — адзначылі ў ведамстве.
Паводле даных Генеральнай пракуратуры, у 2025 годзе на вытворчасці траўмавана 1.835 работнікаў, з іх са смяротным вынікам — 103.
Згодна з інфармацыяй Міністэрства працы і сацыяльнай абароны, у 2024 годзе на вытворчасці атрымалі траўмы 1.849 чалавек (-1 да 2023-га).
Колькасць загінулых на вытворчасці скарацілася са 117 да 105. Гэта быў гістарычны мінімум за ўсе гады існавання Беларусі, сцвярджала Мінпрацы. Такім чынам, паказчык 2025 год стаў новым гістарычным мінімумам.
