“Рэпарцёры без межаў” вельмі занепакоеныя лёсам палітвязня, журналіста Наважылава

2 красавіка, Позірк. Лёсам журналіста Дзмітрыя Наважылава, які не выйшаў на волю, хаця яго імя фігуравала ў спісах памілаваных, што цыркулявалі 19 сакавіка, вельмі занепакоеная міжнародная праваабарончая арганізацыя “Рэпарцёры без межаў” (RSF).

RSF заявіла, што “пенітэнцыярныя ўлады адмаўляюцца паведамляць якую-небудзь інфармацыю” пра Наважылава. “Мы заклікаем да яго неадкладнага вызвалення”, — падкрэсліла арганізацыя.

Па выніках сустрэчы з амерыканскай дэлегацыяй 19 сакавіка ў Мінску Аляксандр Лукашэнка памілаваў 250 зняволеных, з якіх 235 дазволена застацца на радзіме, а 15 было вывезена ў Літву (трое пасля накіраваліся ў Польшчу).

Дзмітрый Наважылаў кіраваў інфармацыйнай кампаніяй БелаПАН са жніўня 2018 года (пасля смерці яе заснавальніка Алеся Ліпая) да студзеня 2021-га. 18 жніўня таго ж года быў затрыманы разам з галоўным рэдактарам БелаПАН Ірынай Леўшынай, якая змяніла яго на пасадзе дырэктара (адбыла тэрмін, знаходзіцца на волі).

Наважылаў быў абвінавачаны паводле двух артыкулаў Крымінальнага кодэкса — ч. 2 арт. 243 (ухіленне ад выплаты падаткаў, збораў, якое прывяло да прычынення ўрону ў буйным памеры) і ч. 1 арт. 361¹ (стварэнне экстрэмісцкага фарміравання, а роўна фарміравання, дзейнасць якога скіраваная на рэабілітацыю нацызму, або кіраўніцтва такім фарміраваннем або структурным падраздзяленнем, якое ўваходзіць у яго).

6 кастрычніка 2022 года Наважылаў, Леўшына, а таксама былы намеснік дырэктара БелаПАН Андрэй Аляксандраў і яго жонка Ірына Злобіна, якія ўтрымліваліся ў няволі з 12 студзеня 2021 года, рашэннем Мінскага абласнога суда былі прыгавораныя да розных тэрмінаў турэмнага зняволення.

Наважылаў быў асуджаны на 6 гадоў пазбаўлення волі (цяпер знаходзіцца ў калоніі № 3 у пасёлку Віцьба Віцебскага раёна). 12 жніўня 2025 года яму споўнілася 53 гады.