У Літве жыхар прыгранічча 13-ы раз за тры гады затрыманы за кантрабанду беларускіх цыгарэт
11 красавіка, Позірк. У Літве “добра знаёмы дзукійскім памежнікам” 27-гадовы мясцовы жыхар быў у чарговы раз затрыманы ля мяжы з Беларуссю за кантрабанду цыгарэт, паведамляе Служба аховы дзяржаўнай мяжы (САДМ) гэтай балтыйскай краіны.
Паводле інфармацыі ведамства, увечары 8 красавіка супрацоўнікі пагранзаставы Кабеляй, якія патрулявалі мяжу, пабачылі, што “ў лесе ля вёскі Сянове з Беларусі перакідваюцца пакункі”.
Службовы сабака ўзяў след, і неўзабаве памежнікі нагналі “мужчыну, які хутка ішоў”, нёс на спіне “дзевяць зялёных звязкаў, злучаных вяроўкамі і замацаваных карабінамі”. У іх, як пасля высветлілася, было 1,3 тыс. пачкаў цыгарэт NZ Gold з беларускімі акцызнымі маркамі коштам 6.994 еўра.
САДМ адзначыла, што мужчына затрыманы 13-ы раз за апошнія тры гады. “Гэты настойлівы жыхар Дзукіі, які рэгулярна трапляецца памежнікам, штрафы не аплачвае і за гэтыя гады назапасіў вялікі доўг перад дзяржавай. І на гэты раз затрыманы з доказамі злачынства адмовіўся даваць тлумачэнні і папрасіў разгледзець справу аб адміністрацыйным правапарушэнні без яго ўдзелу. Пасля апытання і ўручэння позвы на пасяджэнне памежнікі адпусцілі мужчыну”, — гаворыцца ў паведамленні.
У дачыненні да парушальніка распачатая адміністрацыйная вытворчасць за “паўторнае парушэнне парадку набыцця і перавозкі падакцызных тавараў” (санкцыя — штраф ад 5.760 да 6.000 еўра), а таксама за “паўторнае парушэнне прававога рэжыму пагранічнай зоны” (штраф ад 90 да 170 еўра).
