Лукашэнка абмеркаваў па тэлефоне з прэзідэнтам Ірана сітуацыю на Блізкім Усходзе

30 красавіка, Позірк. Прэс-служба Аляксандра Лукашэнкі паведаміла 30 красавіка пра яго тэлефонную размову з прэзідэнтам Ірана Масудам Пезешкіянам.

Адзначаецца, што размова адбылася “з ініцыятывы іранскага боку”.

Пезешкіян, як заяўляецца, праінфармаваў Лукашэнку “аб сітуацыі ў рэгіёне Персідскага заліва, а таксама аб пазіцыі афіцыйнага Тэгерана на перамовах са Злучанымі Штатамі Амерыкі”.

“Суразмоўцы канстатавалі, што галоўным каменем перапоны для выпрацоўкі мірных дамоўленасцяў выступае адсутнасць даверу”, — гаворыцца ў паведамленні.

Беларусь, паводле слоў Лукашэнкі, зацікаўленая ў “больш хуткім урэгуляванні канфлікту”.

Пытанні двухбаковага супрацоўніцтва ў ваеннай сферы абмеркавалі 26 красавіка міністр абароны Беларусі Віктар Хрэнін і намеснік міністра абароны і падтрымкі Узброеных сіл Ірана Рэза Сейфалах Талай Нік.

Сустрэча прайшла ў Бішкеку (Кыргызстан) на палях нарады міністраў абароны дзяржаў — членаў ШАС. Адзначалася, што бакі таксама “абмяняліся думкамі па глабальнай і рэгіянальнай бяспецы”. Асаблівая ўвага на сустрэчы была нададзеная сітуацыі на Блізкім Усходзе.

28 лютага Ізраіль і ЗША пасля правалу перамоваў па ядзернай праграме Тэгерана пачалі ваенныя аперацыі супраць рэжыму аятол у Іране. У выніку быў забіты вярхоўны лідар Ірана Алі Хаменеі, а таксама іншыя прадстаўнікі палітычнага і ваеннага кіраўніцтва Ірана.

Тэгеран наносіў удары ў адказ. Іранскім нападам падвяргаўся не толькі Ізраіль, але і іншыя краіны Блізкага Усходу.

У выніку адной з іранскіх ракетных атак у Ізраілі загінуў ураджэнец Беларусі, які пражываў там, усяго прамымі і ўскоснымі ахвярамі такіх дзеянняў стала 29 чалавек, таксама ў выніку абстрэлаў загінулі чатыры жыхары Палестынскай аўтаноміі.

8 красавіка быў устаноўлены рэжым спынення агню (першапачаткова да 22 красавіка, пасля падоўжаны на перыяд перамоўнага працэсу).

Колькасць ахвяр у Іране дакладна невядомая. Іранскі Чырвоны Паўмесяц паведамляў пра гібель каля 2.000 чалавек і раненні звыш 20.000. Ізраільскія крыніцы заяўляюць пра 7.000 загінулых толькі ў шэрагах сілавых структур Ірана.

Армія ЗША паведаміла пра 13 загінулых амерыканскіх вайскоўцаў у выніку нападаў з Ірана і крушэнні самалёта KC-135 ў Іраку.