У Барысаве 27 дашкольнікаў шпіталізавана з атручваннем

3 чэрвеня, Позірк. 27 дзяцей дашкольнага ўзросту з млоснасцю і ванітамі дастаўлена ўвечары 2 чэрвеня ў інфекцыйнае аддзяленне Барысаўскай цэнтральнай раённай бальніцы (Мінская вобласць), на наступны дзень па меддапамогу звярнуўся яшчэ адзін пацыент з падобнымі сімптомамі, паведамляюць дзяржСМІ.

Паводле слоў галоўнага ўрача бальніцы Аляксандра Дразда, самаадчуванне дзяцей паляпшаецца, але яны працягнуць лячыцца ў стацыянары.

Галоўны дзяржаўны санітарны ўрач Мінскай вобласці Аляксандр Тарасенка сцвярджае, што сітуацыя стабільная, а дзеці знаходзяцца ў здавальняючым стане.

Падкрэсліваецца, што спецыялісты занальнага і абласнога цэнтраў з вечара 2 чэрвеня працуюць у Барысаве, каб “мінімізаваць рызыку распаўсюджвання вострых кішэчных інфекцый сярод насельніцтва“.

Дзе і чым атруціліся дзеці, не паведамляецца.