У Беларусі рэзка знізіліся продажы электрамабіляў
7 ліпеня, Позірк. У чэрвені рынак новых легкавых аўтамабіляў у Беларусі “ўпершыню ў гэтым годзе паказаў адмоўную дынаміку”, вынікае з новага месячнага агляду Беларускай аўтамабільнай асацыяцыі (БАА).
Пры гэтым найбольш прыкметнае падзенне адбылося ў сегменце новых электрамабіляў: па выніках чэрвеня прададзена 2,4 тыс. адзінак — на 31% менш травеньскага выніку. Адзначаецца, што “такое зніжэнне асабліва прыкметнае на фоне папярэдніх месяцаў, калі менавіта электрамабілі былі адным з найбольш хуткарослых сегментаў рынку новых аўтамабіляў”.
У цэлым па рынку “чэрвеньская карэкцыя выявілася дастаткова шырокай: з дзесяці брэндаў — лідараў рынку восем завяршылі месяц з адмоўнай дынамікай у параўнанні з траўнем”, гаворыцца ў аглядзе. Пры гэтым лідарскія пазіцыі ў мадэлях захавалі аўтамабілі лакальнай вытворчасці і звязаныя з ёю брэнды.
На фоне зніжэння продажаў у аўтасалонах павялічыліся аб’ёмы новых аўтамабіляў, увезеных фізічнымі асобамі. У чэрвені іх было ўвезена 1,8 тыс. — на 27% больш, чым у траўні.
На думку асацыяцы, гэтая дынаміка паказвае, што “частка попыту на новыя аўтамабілі можа пераразмяркоўвацца паміж афіцыйным дылерскім каналам і самастойным імпартам”.
Эксперты мяркуюць, што ў чэрвені 2026 года аўтамабільны рынак Беларусі “ўвайшоў у фазу натуральнай летняй стабілізацыі пасля рэкорднага росту ўвесну”.
“Пры зніжэнні на 9% аб’ём у 7,4 тыс. новых аўтамабіляў застаецца другім паводле велічыні месячным вынікам у гэтым годзе, а продажы юрыдычнымі асобамі па выніках паўгоддзя дасягнулі 35,6 тыс. машын, што пацвярджае высокі базавы попыт”, — адзначыў член праўлення асацыяцыі Рыгор Бараноўскі.
Паводле яго слоў, сегмент электрамабіляў нават на фоне адкату аб’ёмаў да красавіцкага ўзроўню захоўвае долю звыш 33% у структуры рынку. Бараноўскі лічыць, што ў чаканні заканчэння квот на бяспошлінны ўвоз электракараў у найбліжэйшыя летнія месяцы можа ўзмацніцца попыт на электратранспарт.
Прадстаўнік БАА таксама адзначыў, што “асобны ўплыў на рынак чыняць змяненні знешніх умоў рэгістрацыі аўтамабіляў фізічнымі асобамі”. “Пастрожанне правіл экспарту аўтамабіляў з Кітая прывяло да перабудовы структуры ўвозу: у першую чаргу гэта выявілася ў істотным зніжэнні ўвозу аўтамабіляў кітайскай карпарацыі BYD і росце доляй марак Chevrolet і Changan”, — патлумачыў ён.
“Доля электрамабіляў сярод аўтамабіляў, што ўвозяцца фізічнымі асобамі, вырасла да ўзроўню звыш 40% у параўнанні з амаль 20% ў 2025 годзе. Гэта адлюстроўвае хуткае змяненне пераваг прыватных пакупнікоў на карысць электратранспарту”, — дадаў Бараноўскі.
Агульны аб’ём аўтамабільнага рынку Беларусі ў 2025 годзе склаў 158,7 тыс. адзінак, паведаміў дырэктар “БАА-Кансалт” Дзмітрый Ярота ў студзені. Гэта ўсе аўтамабілі, пастаўленыя на ўлік, у тым ліку прададзеныя юрыдычнымі асобамі, патлумачыў ён. За год рынак вырас на 14%.
