СК распачаў завочную вытворчасць у дачыненні да яшчэ двух чалавек — Жданко і Шпакоўскага

2 лістапада, Позірк. У дачыненні да яшчэ двух чалавек — Людмілы Жданко і Яўгена Шпакоўскага — распачатая спецыяльная (завочная) вытворчасць, вынікае з інфармацыі ў профільным тэлеграм-канале Следчага камітэта.

Спецвытворчасць у дачыненні да Жданко, якая нарадзілася 16 чэрвеня 1977 года, распачатая 27 кастрычніка. Ёй інкрымінаваныя ч. 1 і 2 арт. 361⁴ (садзейнічанне экстрэмісцкай дзейнасці) і арт. 369 (абраза прадстаўніка ўлады) Крымінальнага кодэкса. Жанчыне прапанавана прыбыць у Баранавіцкі міжраённы аддзел СК (Брэсцкая вобласць).

У дачыненні да Шпакоўскага, які нарадзіўся 29 чэрвеня 1989 года, спецвытворчасць распачатая 29 кастрычніка. Яму ставяцца ў віну дзеянні паводле арт. 364 (гвалт або пагроза ўжывання гвалту ў дачыненні да супрацоўніка органаў унутраных спраў), ч. 1 арт. 368 (абраза прэзідэнта) і арт. 369. Мужчыну выклікаюць ва ўпраўленне СК па Мінскай вобласці.

Раней праваабарончы цэнтр “Вясна” паведамляў, што з 2022 года зафіксавана прынамсі 229 завочных судоў у рамках спецвытворчасці. Агульная колькасць такіх фігурантаў, калі меркаваць паводле даных у профільным тэлеграм-канале СК, — 205. Не менш як трох чалавек прыцягвалі двойчы.

Спецвытворчасць прымяняецца паводле 34 складаў злачынстваў. Сярод іх — акт тэрарызму, генацыд, найміцтва, дзяржаўная здрада, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да ўвядзення санкцый.