МУС прызнала “экстрэмісцкім фарміраваннем” грамадзян, аб’яднаных інтэрнет-рэсурсамі “Мая краіна Беларусь”, “Вусы Лукашэнкі”, “Элехтарат” і “Сяргей Бяспалаў” (дапоўнена)

10 чэрвеня, BPN. Міністэрства ўнутраных спраў 9 чэрвеня прызнала “экстрэмісцкім фарміраваннем” групу грамадзян, аб’яднаных шэрагам вядомых апазіцыйных тэлеграм-каналаў і супольнасцяў у сацыяльных сетках. Інфармацыя пра гэта змяшчаецца ў адпаведным пераліку на сайце МУС.

У пераліку згадваюцца тэлеграм-каналы “Вусы Лукашэнкі”, “Элехтарат”, Historyja, тэлеграм-чаты “Чат Вусы Лукашэнка”, “Чат Элехтарата”, “Рынкавы пляц каля ратушы”, youtube-канал “Сяргей Бяспалаў”, суполкі “Мая краіна Беларусь” у “Фэйсбуку” і “ВКонтакте”, majakrainabelarus — у “Інстаграме” і mkbelarus — у “Твітары”.

12 кастрычніка 2021 года ўрад прыняў пастанову “Аб мерах супрацьдзеяння экстрэмізму і рэабілітацыі нацызму”, якая рэгламентуе рэалізацыю закона “Аб супрацьдзеянні экстрэмізму”.

У галоўным упраўленні па барацьбе з арганізаванай злачыннасцю і карупцыяй МУС у тым жа месяцы папярэдзілі, што “падпіска на экстрэмісцкія каналы і чаты прыводзіць да крымінальнай адказнасці”. Таксама было заяўлена, што “падпісчыкі экстрэмісцкіх тэлеграм-каналаў і чатаў будуць прыцягвацца да крымінальнай адказнасці <…> як удзельнікі экстрэмісцкага фарміравання”.

За распаўсюд “экстрэмісцкіх матэрыялаў” прадугледжаная адміністрацыйная адказнасць, за ўдзел у дзейнасці “экстрэмісцкіх фарміраванняў” — крымінальная.

На сённяшні дзень пералік “экстрэмісцкіх фармаванняў” налічвае каля 70 пазіцый. Сярод іншых гэтым статусам былі надзеленыя інфармацыйная кампанія БелаПАН, тэлеканал “Белсат”, “Радыё Свабода”, “Наша Ніва”, “КУКУ” і інш.