Вярхоўны суд ліквідаваў Аб’яднаную грамадзянскую партыю

15 жніўня, Позірк. Вярхоўны суд 15 жніўня задаволіў іск Міністэрства юстыцыі і ліквідаваў Аб’яднаную грамадзянскую партыю (АГП), паведамляе праваабарончы цэнтр “Вясна”.

Насуперак патрабаванням новай рэдакцыі закона аб палітычных партыях, АГП не падавала ў Мінюст дакументы на перарэгістрацыю.

“Мы гэтае пытанне доўга разглядалі, дыскутавалі, чаму мы не падаем дакументы на перарэгістрацыю. Таму што ўсё гэта незаконна, <…> мы проста ў гэтым балагане не ўдзельнічаем”, — сказаў в.а. старшыні АГП Уладзімір Шанцаў 5 чэрвеня на прэс-канферэнцыі ў Вільнюсе.

Лідар партыі Мікалай Казлоў 3 лістапада 2022 года быў прыгавораны да 2,5 года калоніі паводле арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) — за ўдзел у пратэстным маршы 23 жніўня 2020-га.

14 жніўня ВС ліквідаваў Партыю БНФ, 9 жніўня — Сацыял-дэмакратычную партыю народнай згоды, 8 жніўня — Рэспубліканскую партыю. 20 ліпеня была скасаваная Кансерватыўна-Хрысціянская партыя — БНФ, 24-га — Беларуская патрыятычная партыя, 27-га — Беларуская партыя “Зялёныя”. 31 ліпеня слухалася справа аб ліквідацыі партыі “Беларуская сацыял-дэмакратычная Грамада” (рашэнне невядомае, але ў спісе партый на сайце Мінюста БСДГ больш не фігуруе).

У канцы 2022 года Аляксандр Лукашэнка заявіў, што “на палітычным полі краіны павінны працаваць толькі тыя партыі, дзейнасць якіх адпавядае асноўным прынцыпам унутранай і знешняй палітыкі”. У лютым 2023-га ён падпісаў закон, які апстрожыў патрабаванні да палітычных сіл і абавязаў усе існыя партыі прайсці працэдуру перарэгістрацыі.

Ужо перарэгістраваныя праўладныя Камуністычная партыя Беларусі, Ліберальна-дэмакратычная партыя, Рэспубліканская партыя працы і справядлівасці. Зарэгістравана максімальна лаяльная Аляксандру Лукашэнку партыя “Белая Русь”.