Белстат: За сем месяцаў 2023 года сельгасвытворчасць вырасла на 5,2%

16 жніўня, Позірк. У студзені — ліпені 2023 года ў гаспадарках усіх катэгорый (сельскагаспадарчых арганізацыях, фермерскіх, гаспадарках насельніцтва) вытворчасць прадукцыі ў бягучых цэнах склала 14 млрд рублёў, што ў супастаўных цэнах на 5,2% больш, чым за аналагічны перыяд 2022-га, паведамляе Нацыянальны статыстычны камітэт.

Выраблена жывёлы і птушкі (у жывой вазе) 1 млн 34 тыс. тон (+2,7%), малака — 4 млн 868,3 тыс. тон (+5,7%).

На 1 жніўня ў сельскагаспадарчых арганізацыях налічвалася 4,2 млн галоў буйной рагатай жывёлы (+1,6% у гадавым вымярэнні), у тым ліку 1,4 млн кароў (+0,1%). Колькасць свіней склала 2,4 млн (+0,8%).

У 2022 годзе вытворчасць у галіне ў бягучых цэнах склала 31,8 млрд рублёў, што вышэй у параўнанні з 2021-м у супастаўных цэнах на 3,6%, паведамляў Белстат. За мяжу было пастаўлена сельскагаспадарчай прадукцыі на 8,3 млрд долараў.

Па выніках першай паловы 2023 года Беларусь заняла трэцяе месца ў Еўразійскім эканамічным саюзе (ЕАЭС) па дынаміцы вытворчасці сельскагаспадарчай прадукцыі ў гадавым вымярэнні, сведчаць даныя дэпартамента статыстыкі Еўразійскай эканамічнай камісіі (ЕЭК).

Беларусь лідзіравала па гэтым паказчыку ў студзені — красавіку і студзені — траўні ў параўнанні з аналагічнымі перыядамі 2022 года.

Па выніках першага паўгоддзя на першае месца выйшаў Казахстан (+3,2%). Далей Расія (+2,9%), Беларусь (+2,7%), Кыргызстан (+2,5%) і Арменія (+1,6%).

8 жніўня Аляксандр Лукашэнка падчас прызначэння свайго памочніка — інспектара па Гомельскай вобласці Сяргея Барташа міністрам сельскай гаспадаркі і харчавання, гаворачы аб ураджаі 2023 года, падкрэсліў, што харчовая бяспека будзе гарантавана.

“Мы нарыхтуем крыху менш за мільён тон збожжавых каласавых для дзяржпатрэб. Мы нарыхтуем патрэбную колькасць рапсу. Мы гэта ўжо бачым. Усё тут нармальна складваецца. Калі арганізуемся як след, мы не будзем мець і праблем, звязаных з фуражным збожжам для нашых жывёл. Але зараз трэба мабілізавацца”, — сказаў Лукашэнка.

На селектарнай нарадзе па ўборачнай кампаніі 21 ліпеня Лукашэнка заявіў, што сітуацыя ў сельскай гаспадарцы “далёкая ад ідэальнай”. Спаслаўшыся на інфармацыю ад Генпракуратуры, Камітэта дзяржкантролю і МУС, ён звярнуў увагу на “нізкую гатоўнасць збожжаўборачнай тэхнікі, элеватараў, сховішчаў і праблемы з механізатарскімі кадрамі”.