МУС прызнала “нацысцкай сімволікай і атрыбутыкай” усклік “Жыве Беларусь” і водгук “Жыве”, якія суправаджаюцца нацысцкім прывітаннем

10 лістапада, BPN. Усклік “Жыве Беларусь” і водгук “Жыве” ўнесены ў “Пералік нацысцкай сімволікі і атрыбутыкі” пастановай МУС ад 28 кастрычніка (апублікавана на Нацыянальным прававым інтэрнет-партале 10 лістапада).

“Калабарацыянісцкае прывітанне — з’яўляецца сімвалам 13-га Беларускага паліцэйскага батальёна пры СД і 30-й грэнадзёрскай (пяхотнай) дывізіі Вафен-СС (руская № 2, яна ж — беларуская № 1) нароўні з нацысцкім партыйным прывітаннем “Хайль Гітлер” і ўяўляе (нацысцкае прывітанне. — BPN.) вокліч “Жыве Беларусь” і водгук “Жыве”, якія суправаджаюцца ўзняццем правай рукі з распрастанай далонню”, — гаворыцца ў пункце 4 пераліку.

МУС не ўдакладняе, ці з’яўляюцца нацысцкімі прывітанні “Жыве Беларусь” і “Жыве”, калі яны не суправаджаюцца “ўзняццем правай рукі з распрастанай далонню”.

У пастанове гаворыцца, што яна ўзгоднена з Міністэрствам юстыцыі, Камітэтам дзяржбяспекі і Нацыянальнай акадэміяй навук.

Аляксандр Лукашэнка і яго прапагандысцкі апарат многія гады прыраўноўваюць сваіх апанентаў да памагатых гітлераўцаў. У 1995 годзе ў інтэрв’ю нямецкай газеце “Хандэльсблат” Лукашэнка станоўча адазваўся аб Адольфе Гітлеру, з якім, на яго думку, было звязана “не ўсё толькі дрэннае”. “У свой час Германія была паднята з руін дзякуючы вельмі жорсткай уладзе. Не ўсё толькі дрэннае было звязана ў Германіі з вядомым Адольфам Гітлерам… Нямецкі парадак фарміраваўся стагоддзямі, пры Гітлеры гэтае фарміраванне дасягнула найвышэйшай кропкі. Гэта тое, што адпавядае нашаму разуменню прэзідэнцкай рэспублікі і ролі ў ёй прэзідэнта”, — сказаў Лукашэнка.