Лукашэнка назваў Беларусь “надзейным сябрам” і “прадказальным партнёрам” для Катара

18 снежня, BPN. Паміж Мінскам і Дохай склаліся адносіны “сапраўднага сяброўства і даверу”, гаворыцца ў віншаванні Аляксандра Лукашэнкі эміру Катара шэйху Таміме бен Хамада аль-Тані з Нацыянальным днём.

Як сцвярджае Лукашэнка, у Беларусі “з захапленнем” сачылі за тым, як у Катары на працягу некалькіх гадоў будавалі для чэмпіянату свету па футболе 2022 года стадыёны, атэлі і транспартную інфраструктуру.

“Мы рады, што катарскае кіраўніцтва, нягледзячы на цяжкасці і неверагодны ціск падчас чэмпіянату, здолела прадэманстраваць усяму свету свае эканамічныя і архітэктурныя дасягненні, старажытную гісторыю і багатую культурную спадчыну”, — цытуе яго прэс-служба.

Ён падкрэсліў, што Беларусь імкнецца развіваць узаемадзеянне з Катарам па розных напрамках, у тым ліку сферы гандлю, інвестыцый, харчовай бяспекі і перадавых тэхналогій.

Лукашэнка запрасіў кіраўніка арабскай дзяржавы наведаць Беларусь “у любы зручны для яго час”.

У віншавальным пасланні намесніку эміра шэйху Абдалле бен Хамаду аль-Тані гаворыцца, што “кожная краіна мае права на ідэнтычнасць, павагу да сваёй культуры і традыцый, уласны шлях развіцця”.

Ён назваў Беларусь “надзейным сябрам і прадказальным партнёрам для Катара”.

5 кастрычніка тады яшчэ першы намеснік міністра замежных спраў (цяпер кіраўнік МЗС) Сяргей Алейнік правёў перамовы аб “пашырэнні гандлёва-эканамічнага супрацоўніцтва” з часовым павераным у справах Катара Мешаалем аль-Атыяй. Аналагічную тэму абмяркоўвалі ў гэты ж дзень часовы павераны ў справах Беларусі ў гэтай краіне Аляксей Малафей і першы намеснік старшыні гандлёва-прамысловай палаты Катара Махамед бен Ахмед бен Таўар аль-Кавары.

Дыпламатычныя адносіны паміж краінамі ўстаноўлены 16 студзеня 1996 года. У 2001–2008 і 2010–2018 гадах паслы Беларусі ў ААЭ былі акрэдытаваны ў Катары па сумяшчальніцтве. Цяпер пасол Беларусі ў Катары не назначаны. Пасольства Беларусі ў горадзе Доха працуе з 2014 года. З лістапада 2019-га функцыянуе пасольства Катара ў Мінску, дзяржава прадстаўлена на ўзроўні часовага паверанага ў справах.

Мінулагоднія дадзеныя па гандлі з Катарам адсутнічаюць. Да гэтага, у 2020 годзе, паводле звестак МЗС Беларусі, зафіксавана значнае зніжэнне тавараабароту: да 2 млн 139,7 тыс. долараў у 2020 годзе супраць 4 млн 907 тыс. у 2019-м (на 47,7%).