Літва дэнансуе пагадненне аб прыгранічным супрацоўніцтве з Беларуссю

18 студзеня, BPN. Урад Літвы пастанавіў на пасяджэнні 18 студзеня дэнансаваць пагадненне з Беларуссю аб асноўных прынцыпах прыгранічнага супрацоўніцтва, паведаміла прэс-служба Міністэрства ўнутраных спраў Літвы.

“Рэалізацыя двухбаковага міжурадавага пагаднення з Беларуссю немагчымая ў цяперашняй геапалітычнай сітуацыі і не будзе магчымая ў найбліжэйшай будучыні”, — заявіла міністр унутраных спраў Агне Білатайце.

Пагадненне паміж Беларуссю і Літвой іаб асноўных прынцыпах прыгранічнага супрацоўніцтва было падпісана 1 чэрвеня 2006 года. У ім выкладзены прынцыпы супрацоўніцтва ў галіне перамяшчэння транспартных сродкаў і пасажыраў праз граніцу, абмену інфармацыяй, аказання дапамогі на граніцы ў выпадку надзвычайных сітуацый прыроднага і тэхнагеннага характару.

Як патлумачылі ў МУС Літвы, рашэнне прынятае ў святле палітычнай сітуацыі ў Беларусі, “пасля фальсіфікацыі прэзідэнцкіх выбараў 2020 года, інструменталізацыі рэжымам Лукашэнкі міграцыі супраць краін Еўрасаюза і яго ўдзелу ў вайне супраць Украіны”.

У кастрычніку 2020 года Літва прыпыніла выплаты Беларусі і яе партнёрам па бягучых праектах у рамках Праграмы трансгранічнага супрацоўніцтва, а 25 лістапада мінулага года скасавала пагадненне аб супрацоўніцтве з МУС Беларусі.