Камітэты бундэстага рэкамендавалі адхіліць рэзалюцыю па Беларусі, прапанаваную апазіцыйнай фракцыяй ХДС/ХСС

8 красавіка, BPN. Камітэты нямецкага парламента па замежных справах, унутраных справах і радзіме, эканоміцы, правах чалавека і гуманітарнай дапамозе рэкамендавалі адхіліць рэзалюцыю “Вярнуць Беларусь у сям’ю еўрапейскіх народаў — падтрымаць імкненне людзей да свабоды”, якую прапанавала апазіцыйная фракцыя хрысціянскіх дэмакратаў ХДС/ХСС.

Супраць прыняцця рэзалюцыі выступілі прадстаўнікі ўсіх астатніх фракцый: як сацыял-дэмакратаў, “зялёных” і свабодных дэмакратаў, якія ўваходзяць у кіруючую кааліцыю, так і апазіцыйных левых і праварадыкальнай “Альтэрнатывы для Германіі” (“АдГ”).

Праект рэзалюцыі папярэдне абмяркоўваўся на пленарным пасяджэнні бундэстага 25 студзеня. На падтрымку дэмакратычных пераўтварэнняў у Беларусі выступіла пераважная большасць выступоўцаў: адкрыта супраць выказаліся толькі прадстаўнік “АдГ” і адзін пазафракцыйны дэпутат.

У дакуменце канстатавалася, што сітуацыя з правамі чалавека ў Беларусі пачала сістэмна пагаршацца яшчэ да “сфальсіфікаваных прэзідэнцкіх выбараў 9 жніўня 2020 года”, задакументаваны гвалт і катаванні ў дачыненні да мірных дэманстрантаў, якія патрабавалі сумленнага падліку галасоў, дасягнулі беспрэцэдэнтных маштабаў. Лукашэнка, падкрэсліваюць парламентарыі, утрымлівае ўладу толькі “з дапамогай гвалту з боку свайго разгалінаванага апарата рэпрэсій і сачэння”, а таксама залежыць ад “палітычнай і фінансавай падтрымкі расійскага кіраўніцтва ў Маскве”. Вайна Расіі супраць Украіны паказала, “наколькі крохкі і залежны” рэжым ад РФ.

У праекце рэзалюцыі змяшчаецца дзесяць патрабаванняў бундэстага да ўрада, у тым ліку “працягнуць працу над жорсткімі кропкавымі санкцыямі супраць усяго беларускага апарата сілавікоў”, “надаць маштабную падтрымку ахвярам гвалту, рэпрэсій і катаванняў, аблегчыць уезд грамадзянам Беларусі, у дачыненні да якіх даказаны палітычны пераслед”, “пастаянна працягваць і павялічваць палітычную і фінансавую падтрымку дэмакратычных сіл, перш за ўсё Аб’яднанага пераходнага кабінета Святланы Ціханоўскай у выгнанні, беларускай грамадзянскай супольнасці і свабодных СМІ”, “прасоўваць у ЕС план палітычнай і эканамічнай падтрымкі Беларусі ў выпадку дэмакратычных пераўтварэнняў”, “змагацца за найхутчэйшыя свабодныя і сумленныя выбары ў Беларусі”, “змагацца за неадкладнае вызваленне ўсіх палітвязняў, задакументаваць тое, што адбываецца з імі, і такім чынам спрыяць судоваму пераследу катаў і іх апекуноў пасля падзення рэжыму Лукашэнкі”, “паслаць палітычны сігнал, што ў будучыні еўрапейская перспектыва ёсць і для Беларусі”.

BPN звярнуўся ва ўсе фракцыі бундэстага з просьбай патлумачыць матывы галасавання іх прадстаўнікоў у камітэтах. Адказы далі “зялёныя” і вольныя дэмакраты. Паводле слоў дэпутата ад “зялёных”, сузаснавальніка міжфракцыйнай групы “Дэмакратычная Беларусь” Робіна Вагенера, яго фракцыя “цвёрда і непахісна падтрымлівае беларускі дэмакратычны рух”. Амаль палова дэпутатаў стала “хроснымі” палітвязняў, супрацоўніцтва з беларускай грамадзянскай супольнасцю і апазіцыяй у выгнанні “было і застаецца цесным”. “На гэтым фоне нас усцешыла ініцыятыва ХДС/ХСС, паколькі яна выклікала дэбаты на пленарным пасяджэнні і зноў прыцягнула ўвагу да гэтай вельмі важнай тэмы”, — зазначыў Вагенер. Аднак ён выказаў шкадаванне, што хрысціянскія дэмакраты не прапанавалі кіруючай кааліцыі выступіць з сумеснай заявай.

“Гэта стала б парламенцкай практыкай — сумесна выпрацаваць і прыняць заяву”, — лічыць дэпутат. Ён нагадаў, што ў лістападзе 2020 года бундэстаг папярэдняга склікання выступіў за спыненне ў Беларусі рэпрэсій і правядзенне новых выбараў і тады рэзалюцыю ўнеслі на разгляд і падтрымалі як кіруючыя (ХДС/ХСС, СДПГ), так і апазіцыйныя фракцыі (“зялёныя”, СвДП).

“Але гэта, вядома, не мяняе таго факту, што ў нямецкім бундэстагу вельмі шырокая салідарнасць з беларускім дэмакратычным рухам”, — падкрэсліў Вагенер. Паводле яго слоў, нядаўна створаная група “Дэмакратычная Беларусь” дазволіць “інтэнсіфікаваць кантакты з дэмакратычнай грамадзянскай супольнасцю і апазіцыяй”.

Фракцыя свабодных дэмакратаў адхіліла праект рэзалюцыі па Беларусі, палічыўшы яе залішняй, паведаміла BPN дэпутат Аніка Глагоўскі-Мертэн. “Урад робіць усё магчымае, каб не забыць народ Беларусі”, — падкрэсліла яна. Дэпутат адзначыла, што ўзяла шэфства над Ірынай Мельхер і яе сынам Антонам Мельхерам, асуджанымі па “справе Аўтуховіча”. 67-гадовая маці прыгаворана да 17 гадоў пазбаўлення волі, сын ужо адбыў тэрмін (2,5 года).

“Барацьба за свабоду людзям у Беларусі абыходзіцца вельмі дорага. Таму я радая, што фракцыя ХДС/ХСС ініцыявала заяву супраць бесчалавечнай палітыкі ў Беларусі — гэта як мінімум прыцягвае ўвагу. Аднак федэральны ўрад ужо выканаў усе пункты [праекта дакумента]. Замест чыста сімвалічнага характару [заявы] нас больш узрадуе канструктыўнае супрацоўніцтва ў структурах парламента”, — заявіла Глагоўскі-Мертэн.

Гл. больш падрабязна аб праекце заявы па Беларусі:

Фракцыя ХДС у бундэстагу прапануе ўвесці “жорсткія і мэтанакіраваныя” санкцыі супраць “усяго беларускага сілавога апарата”

Гл. больш падрабязна аб абмеркаванні праекта заявы па Беларусі:

Дэпутат бундэстага — беларусам: Не губляйце надзею, любому рэжыму надыходзіць канец

Гл. больш падрабязна аб дэпутацкай групе “Дэмакратычная Беларусь”:

У бундэстагу створана група “Дэмакратычная Беларусь”