1 снежня, Позірк. У лістападзе 2025 года на тэрыторыю Беларусі прыбыло 8.583 грамадзяніны Украіны — на 12,7% менш, чым у кастрычніку (9.837), сведчыць праведзены “Позіркам” аналіз штомесячных даных Дзяржаўнага пагранічнага камітэта.
Транзітам праз Польшчу ў мінулым месяцы прыбыло 8.255 (8.576 месяцам раней), Літву — 190 (1.197; у 6,3 раза менш), Латвію — 135 (62; у 2,1 раза больш), непасрэдна з Украіны — 3 (2).
Ад пачатку 2025 года ў Беларусь уехала 106.362 грамадзяніны Украіны: праз украінска-беларускую мяжу — 61, транзітам праз Польшчу — 84.993, Літву — 19.209, Латвію — 2.099.
Праведзены “Позіркам” аналіз статыстычных даных Дзяржпагранкамітэта паказаў, што з пачатку поўнамаштабнай расійскай агрэсіі (24 лютага 2022 года), у Беларусь уехала 387.222 грамадзяніны Украіны. З іх непасрэдна праз украінска-беларускую мяжу — 16.078, транзітам праз Польшчу — 289.652, Літву — 72.872, Латвію — 8.620.
Паводле інфармацыі пагранічнага ведамства, за 2024 год у Беларусь заехаў 134.561 грамадзянін Украіны. У прыватнасці, як сцвярджалася, з тэрыторыі Украіны гэта зрабіла 68 чалавек, транзітам праз Польшчу — 107.154, Літву — 25.362, Латвію — 1.977. Паводле прыблізных разлікаў “Позірку”, у 2023 годзе ў Беларусь прыбыло больш за 71 тыс. грамадзян Украіны; такім чынам, за год іх колькасць вырасла прыкладна ў 1,9 раза.
“Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй”, — заявіў у інтэрв’ю “Позірку” ў лютым 2024 года Ігар Кізім, які на той момант займаў пасаду амбасадара па асаблівых даручэннях МЗС Украіны па Беларусі. Паводле яго слоў, гаворку трэба весці пра звычайныя паездкі грамадзян Украіны ў Беларусь.
Апошнія апублікаваныя на сённяшні дзень даныя ААН дэманструюць, што пасля значнага скарачэння колькасці ўкраінскіх уцекачоў, якое назіралася раней, яна крыху вырасла. На 14 лістапада па ўсім свеце іх налічвалася 5.880.360 (на 3 кастрычніка — 5.752.670, на 31 ліпеня — 5.675.680, на 17 красавіка — 6.917.800), у тым ліку ў краінах Еўропы — 5.331.270 (5.192.110, 5.115.120, 6.357.600).
