МЗС Чарнагорыі: Беларусь увяла візы для грамадзян краіны

2 лістапада, Позірк. Аб увядзенні Беларуссю з 1 лістапада візавага рэжыму для грамадзян Чарнагорыі паведаміла Міністэрства замежных спраў гэтай балканскай краіны.

У апублікаванай 31 кастрычніка заяве ведамства адзначыла, што атрымала афіцыйную ноту пасольства Беларусі (у Сербіі, прадстаўляе Мінск таксама ў Чарнагорыі. — “Позірк”.). Падгорыцы паведамлена, што з яе грамадзянам для ўезду на беларускую тэрыторыю патрабуецца віза.

МЗС Чарнагорыі зрабіў гэтае паведамленне ў кантэксце пачатку дзеяння новага візавага рэжыму самой Падгорыцы ў дачыненні да грамадзян Беларусі, Кітая, Расіі, Турцыі і Саудаўскай Аравіі.

Пры гэтым, паводле прыведзенай ведамствам інфармацыі кітайскага пасольства ў Падгорыцы, грамадзяне Чарнагорыі захоўваюць магчымасць бязвізавых паездак у Кітай да 31 снежня 2026 года.

Міністэрства рэкамендавала грамадзянам сачыць за афіцыйнымі паведамленнямі кампетэнтных органаў замежных дзяржаў і іх акрэдытаваных у Чарнагорыі дыпламатычных і консульскіх прадстаўніцтваў аб умовах паездак.

Аб увядзенні Чарнагорыяй з 1 лістапада 2026 года візавага рэжыму для грамадзян Беларусі МЗС балканскай дзяржавы паведаміў 27 ліпеня. Адзначалася, што рашэнне было прынята “ў рамках прывядзення візавай палітыкі краіны ў адпаведнасць з правіламі Еўрапейскага саюза”.

МЗС Беларусі якіх-кольвек афіцыйных заяў наконт увядзення віз для грамадзян Чарнагорыі не рабіў, аднак, як вынікае з актуальнага пераліку дзяржаў, з якімі ў Мінска дзейнічае бязвізавы рэжым, балканскай дзяржавы там ужо няма.

Чарнагорыя не ўваходзіць таксама і ў спіс 38 еўрапейскіх дзяржаў, грамадзяне якіх могуць уязджаць у Беларусь без віз на тэрмін не больш за 30 сутак.

Афіцыйны прадстаўнік МЗС Расіі Марыя Захарава анансавала ўвядзенне Масквой візавага рэжыму ў дачыненні да грамадзян Чарнагорыі 14 кастрычніка.