2 лістапада, Позірк. Беларускія наймальнікі павінны будуць аплачваць палову выдаткаў на стварэнне працоўных месцаў для людзей з інваліднасцю, вынікае з паведамлення прэс-службы Савета міністраў.
Адзначаецца, што прэм’ер-міністр Аляксандр Турчын падпісаў пастанову, згодна з якой выдаткі на стварэнне працоўных месцаў будуць фінансавацца на ўмовах роўнадолевага ўдзелу бізнесу і дзяржавы: кожны бок пакрые па 50%. Раней дзяржава цалкам фінансавала гэты працэс.
Акрамя таго, уводзіцца патрабаванне да аплаты працы на ствараемым працоўным месцы: заробак мае складаць не менш за 150% мінімальнага заробку.
Змяняецца таксама ўмова выдачы бюджэтнага фінансавання, звязаная з колькасцю работнікаў з інваліднасцю. Згодна з ранейшымі правіламі, фінансаванне выдзялялася, калі колькасць запланаваных новых працоўных месцаў для людзей з інваліднасцю перавышала 3% колькасці работнікаў. Цяпер гэтая доля мае складаць не менш за 3% колькасці работнікаў арганізацыі.
Новыя патрабаванні не будуць распаўсюджвацца на стварэнне працоўных месцаў для людзей з інваліднасцю ў сельскай мясцовасці і гарадах з насельніцтвам да 20 тыс. чалавек.
Парадак фінансавання і кампенсацыі выдаткаў на стварэнне і захаванне працоўных месцаў для працаўладкавання людзей з інваліднасцю рэгулюецца пастановай Савета міністраў № 128 ад 2 лютага 2009 года. Яна прадугледжвае выкарыстанне бюджэтных сродкаў для фінансавання і кампенсацыі такіх выдаткаў. У прыватнасці, выдаткі на стварэнне працоўных месцаў кампенсаваліся наймальнікам у межах вызначаных умоў і лімітаў.
Новы дакумент падрыхтаваны “ў мэтах падвышэння эфектыўнасці выкарыстання бюджэтных сродкаў, якія выдзяляюцца на фінансаванне (кампенсацыю) стварэння (захавання) працоўных месцаў для людзей з інваліднасцю”, адзначаецца ў паведамленні.
Паводле даных Міністэрства працы і сацыяльнай абароны, у Беларусі каля 550 тыс. людзей з інваліднасцю, з іх працуе больш за 71 тыс. Гэта 61,5% грамадзян з інваліднасцю, якія маюць рэкамендацыі да працы.
