Украіна ўвяла санкцыі на 5 і 10 гадоў супраць двух фізічных і шасці юрыдычных асоб у сферы беларускага ВПК

1 ліпеня, BPN. Указам прэзідэнта Уладзіміра Зяленскага ўведзена ў дзеянне рашэнне Савета нацыянальнай бяспекі і абароны Украіны ад 1 ліпеня аб новых санкцыях супраць Расіі і Беларусі.

У санкцыйныя спісы ўключаны дзве фізічныя і шэсць юрыдычных асоб у сферы беларускага ваенна-прамысловага комплексу.

10 гадоў абмежавальныя меры будуць дзейнічаць у адносінах да:

Аляксандра Мароза (15.06.1975) — дырэктара Мінскага механічнага завода імя Вавілава — кіруючай кампаніі холдынгу “БелОМА”, члена Савета Рэспублікі Нацыянальнага сходу;

Аляксея Шкадарэвіча (27.10.1947) — вучонага ў галіне лазернай фізікі і прыборабудавання, акадэміка Нацыянальнай акадэміі навук Беларусі;

заводаў “Дыяпраектар” (Рагачоў), “Зеніт-БелОМА” (Вілейка), “Оптык” (Ліда), беларуска-нямецкага сумеснага прадпрыемства “Цэйс-БелОМА” (Мінск).

5 гадоў пад санкцыямі будуць знаходзіцца:

канструктарскае бюро “Беспілотныя верталёты” (Мінск), Навукова-вытворчы цэнтр шматфункцыянальных беспілотных комплексаў Нацыянальнай акадэміі навук.

Санкцыі ўключаюць 12 пунктаў для фізічных асоб і 14 — для юрыдычных, у тым ліку:

— блакаванне актываў;

— абмежаванне або поўнае спыненне гандлёвых аперацый, транзіту праз тэрыторыю Украіны;

— спыненне вывазу капіталу за межы Украіны;

— спыненне выканання эканамічных і фінансавых абавязацельстваў;

— ануляванне ліцэнзій і іншых дазволаў на тую ці іншую дзейнасць;

— забарону ўдзелу ў прыватызацыі;

— забарону перадачы тэхналогій.

Папярэдні раз Украіна ўвяла санкцыі супраць Беларусі сёлета 27 траўня.

Падрабязней і перадгісторыя:

Украіна ўвяла санкцыі яшчэ супраць 20 прадпрыемстваў беларускага ВПК