Ціханоўская падзякавала Германіі за адмову накіроўваць амбасадара ў Мінск
Сустрэча Святланы Ціханоўскай і Енса Плётнера (злева на правым баку стала)
9 лістапада, Позірк. Падчас сустрэчы ў Берліне з дарадцам федэральнага канцлера па пытаннях знешняй палітыкі і палітыкі бяспекі Енсам Плётнерам дэмакратычны лідар Святлана Ціханоўская падзякавала ўраду Германіі за рашэнне не накіроўваць амбасадара ў Мінск, а таксама за супрацоўніцтва з Аб’яднаным пераходным кабінетам. Пра гэта “Позірку” паведаміў галоўны дарадца Ціханоўскай Франак Вячорка.
На сустрэчы абмяркоўваліся пытанні выдачы беларускім грамадзянам у Германіі пашпартоў замежнікаў, праект “пашпарта новай Беларусі”, магчымыя крокі па вызваленні палітвязняў і падтрымцы іх сем’яў.
Суразмоўцы абмеркавалі стратэгію ў дачыненні да Беларусі, санкцыйны ціск і магчымасці закрыцця шляхоў абыходу абмежаванняў, міграцыйны крызіс, расійскую вайсковую прысутнасць у Беларусі.
Паводле слоў Вячоркі, Ціханоўская папрасіла Германію падтрымаць еўрапейскую будучыню Беларусі на федэральным узроўні, а таксама ў рамках ЕС.
Пасля падзей 2020 года адзінай краінай Еўрасаюза, якая накіравала ў Беларусь амбасадара, стала Венгрыя. Астатнія дзяржавы ЕС пасля заканчэння кадэнцый прызначаных раней амбасадараў абмяжоўваюць дыпламатычную прысутнасць узроўнем паверанага ў справах. У той жа час у Мінску працуе амбасадар нейтральнай Швейцарыі, якая далучылася да санкцый ЕС супраць беларускіх уладаў.