Саша Філіпенка: Мы пакуль не ведаем, дзе бацька і ў чым яго абвінавачваюць

9 лістапада, Позірк. З моманту затрымання сям’я не ведае, дзе знаходзіцца бацька беларускага пісьменніка Сашы Філіпенкі. Пра гэта ён паведаміў у эфіры расійскага тэлеканала “Дождь”.

“У 8 раніцы ўварваліся людзі з аўтаматамі, паклалі маму і тату на падлогу. На бацьку адразу апранулі кайданкі. Тату 60 і маме 60, не ведаю, які яны маглі аказваць супраціў”, — адзначыў пісьменнік.

Пра ператрус у кватэры бацькоў Філіпенка паведаміў раніцай 9 лістапада. Паводле яго інфармацыі, канфіскаваныя тэлефоны і тэхніка. Сыходзячы, сілавікі сказалі ягонай маці: “Скажыце дзякуй сыну”. Бацька пісьменніка быў затрыманы.

Як адзначыў Філіпенка, у сям’і раней абмяркоўвалі, што такое можа здарыцца. Бацька не хацеў з’язджаць, бо не мае адносінаў да ягоных выказванняў.

“Былі сігналы. Яго звольнілі з працы, яму перадавалі, што трэба, каб я замаўчаў. Ён казаў: “Мне 60, майму сыну 40 амаль, дзіўна, калі я яму буду казаць, што рабіць”, — адзначыў пісьменнік.

Можна ва ўсё паверыць у Беларусі, акрамя таго, што ў закладнікі бяруць бацькоў, дадаў Філіпенка. Ён падкрэсліў, што ў падобнай сітуацыі аказалася не толькі яго сям’я, але і ўсе беларусы.

“Самае галоўнае адрозненне нас ад гэтых людзей у тым, што я ганаруся сваім бацькам, я ведаю, што ён ганарыцца мной і заўсёды ганарыўся тым, што я раблю”, — сказаў Філіпенка.

“Калі мне скажуць вярнуцца і пакаяцца, то, відавочна, каб мяне роўна так жа “закрыць”, — упэўнены пісьменнік. — Мне трэба працягваць рабіць тое, што я раблю. Максімум, на што яны рэагуюць, — гэта той максімум, які я магу рабіць у Еўропе. Я пішу для многіх еўрапейскіх газет і працягваю распавядаць пра тое, што адбываецца ў нас у краіне”.

Пісьменнік адзначыў, што “на фоне канфлікту ў Ізраілі забываюць пра вайну ва Украіне, а на Беларусь тым больш забыліся даўным-даўно. Пра тое, што ў нас адбываюцца рэпрэсіі кожны дзень, увогуле ніхто не памятае”.

“У гэтым сэнсе падаецца значна больш важным, каб я працягваў казаць пра тое, што адбываецца”, — заявіў Філіпенка.

Аляксандр (Саша) Філіпенка — беларускі літаратар, журналіст, сцэнарыст, тэлевядучы.

Пасля падзей 2020 года стаў адным з галасоў беларускага пратэстнага руху ў Еўропе.

Неаднаразова выступаў у абарону беларускіх палітвязняў у расійскай, нямецкай, англійская, шведскай, галандскай, польскай, французскай прэсе. Падтрымлівае Украіну ў яе барацьбе супраць расійскай агрэсіі.

У ліпені 2023 года ў Вільнюсе адбылася прэм’ера спектакля паводле п’есы Сашы Філіпенкі “Ціхары”. Пастаноўка ў сатырычнай форме паказвае беларускіх сілавікоў, якія пад выглядам звычайных грамадзян высочваюць удзельнікаў пратэстаў.