10 лістапада, Позірк. Маргарыта Варыхава — дарадца беларускага дэмакратычнага лідара Святланы Ціханоўскай па маладзёжнай палітыцы і студэнцтве — 9 лістапада ў Бруселі атрымала прэмію “Маладая жанчына Еўропы 2023”.
Паводле інфармацыі прэс-службы дэмлідара, гэта ўзнагарода па адной з чатырох намінацый прэміі “Жанчына Еўропы”, якая штогод уручаецца за прасоўванне еўрапейскіх каштоўнасцяў. Ворыхава прысвяціла прэмію ўсім маладым лідарам Беларусі, адзначыўшы іх “вырашальную ролю ў фармаванні будучыні і абароне дэмакратыі”.
“Гэтая ўзнагарода — пацвярджэнне вялізнага патэнцыялу і сілы, якую мае наша моладзь. Мы разумеем, што абарона дэмакратыі не з’яўляецца нечым само сабой зразумелым. Гэта бесперапынная барацьба, якая патрабуе пільнасці, непахіснай рашучасці і адвагі супрацьстаяць несправядлівасці”, — заявіла яна.
Ворыхава абвясціла, што ў студзені далучыцца да Кансультатыўнай рады па справах моладзі пры Савеце Еўропы. “Гэтая роля дасць мне магчымасць працягваць сваю місію, узмацняць галасы моладзі і падтрымліваць барацьбу за дэмакратыю не толькі ў Беларусі, але і ва ўсіх кутках Еўропы”, — адзначыла дарадца Ціханоўскай.
Прэмія “Жанчыны Еўропы” заснавана ў 2016 годзе. Яна заклікана “падкрэсліць унёсак жанчын у асвятленне і вырашэнне еўрапейскіх праблем, <…> пашырыць іх удзел у дыскусіях аб Еўропе і яе будучыні”, “адзначыць і прадэманстраваць натхняльныя ініцыятывы, якія даюць магчымасць выказацца жанчынам па ўсёй Еўропе і абараніць <…> дэмакратыю, інклюзіўнасць і культурная разнастайнасць”.
Аўтарызавацца
Забыліся пароль?
Выхад з профілю
