Літва, Польшча і ЗША асудзілі ў ААН размяшчэнне ў Беларусі расійскай ядзернай зброі

6 кастрычніка, Позірк. На пасяджэнні Першага камітэта (па раззбраенні і міжнароднай бяспецы) Генасамблеі ААН прадстаўнікі Літвы, Польшчы і ЗША асудзілі размяшчэнне ў Беларусі тактычнай ядзернай зброі (ТЯЗ).

Стэнаграму дыскусіі апублікавала прэс-служба ААН.

Прадстаўнік Літвы Арунас Евалтас заявіў, што Беларусь парушае свае абавязацельствы па дамове аб нераспаўсюджванні ядзернай зброі (ДНЯЗ).

Паводле яго слоў, будучы ў статусе дзяржавы, якая не валодае ядзернай зброяй, Мінск дазволіў яе размяшчэнне на сваёй тэрыторыі.

Польскі дыпламат Яцэк Савіч у сваім выступленні адзначыў, што з’яўленне расійскай ТЯЗ у Беларусі павышае небяспеку эскалацыі абстаноўкі, сур’ёзна ўплываючы на рэгіянальную і глабальную бяспеку.

Прадстаўнік ЗША (прозвішча не прыводзіцца) выказаў заклапочанасць заявамі Аляксандра Лукашэнкі аб тым, што “ён кантралюе ядзерную зброю, якая знаходзіцца ў Беларусі”. Амерыканскі дыпламат падкрэсліў, што, паводле ДНЯЗ, захоўванне і кантроль гэтых узбраенняў — абавязак Расіі.

13 чэрвеня падчас паездкі ў Мінскую вобласць Лукашэнка даў інтэрв’ю расійскай прапагандыстцы Вользе Скабеевай, з якой вынікала, што ў Беларусь з Расіі дастаўленая частка ядзернай зброі. Раней у той дзень ён сказаў прадстаўнікам дзяржаўных медыя, што гатовы “неадкладна і без ваганняў” прымяніць ядзерную зброю ў выпадку агрэсіі супраць Беларусі.

16 чэрвеня прэзідэнт РФ Уладзімір Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесцяць “да канца лета або да канца года”.

1 жніўня Лукашэнка сказаў, што больш за палову ТЯЗ, якую запланавана размясціць на беларускай тэрыторыі, ужо “завезена і разгрупавана” па краіне.

31 жніўня начальнік Галоўнага ўпраўлення выведкі Міністэрства абароны Украіны Кірыл Буданаў заявіў у інтэрв’ю тэлеканалу “1+1”, што першыя ядзерныя боегалоўкі былі дастаўленыя з РФ у Беларусь “літаральна некалькі дзён таму”, а да гэтага на беларускай тэрыторыі праводзіліся толькі “маштабныя трэніроўкі з ядзернымі імітатарамі”.

17 верасня намеснік дзяржсакратара Савета бяспекі Беларусі Павел Муравейка ў эфіры тэлеканала СТБ заявіў, што беларускія вайскоўцы маюць адпаведную падрыхтоўку для выкарыстання ядзернай зброі.Спецыялісты, сказаў Муравейка,”прайшлі пэўны кантрольны зрэз і допуск, атрымаўшы магчымасць выкарыстоўваць і ўжываць гэтую зброю”.