Хворы на рак старшыня ліквідаванай уладамі Партыі БНФ Кастусёў пакараны пераводам у памяшканне камернага тыпу
Рыгор Кастусёў (другі злева)
19 лістапада, Позірк. Старшыня ліквідаванай уладамі Партыі БНФ Рыгор Кастусёў змешчаны ў памяшканне камернага тыпу (ПКТ), паведаміў у “Фэйсбуку” ягоны зяць Зміцер Антончык.
“Пацвердзілася інфармацыя”, — адзначыў ён.
Паводле Антончыка, хутчэй за ўсё, у ПКТ Кастусёў знаходзіцца з 11 лістапада.
66-гадовы палітык пакутуе на анкалагічнае захворванне, у красавіку яго пераводзілі ў лякарню.
У чэрвені і ліпені палітвязень як мінімум чатыры разы быў змешчаны на 10 сутак у штрафны ізалятар. Акрамя таго, Кастусёў быў пазбаўлены спатканняў са сваякамі, у яго адабралі асабістыя запісы і кантакты для перапіскі.
Палітык быў затрыманы 12 красавіка 2021 года ў рамках “справы змоўшчыкаў”.
5 верасня 2022 года суддзя Уладзімір Арэшка з Мінскага абласнога суда прыгаварыў яго да 10 гадоў пазбаўлення волі паводле ч. 1 арт. 357 КК (змова з мэтай захопу ўлады неканстытуцыйным шляхам). Віну Кастусёў не прызнаў.
29 лістапада Вярхоўны суд адхіліў скаргу на вырак і пакінуў яго ў сіле.
9 снежня 2022 года МУС унесла палітвязня ў пералік асоб, “датычных да экстрэмісцкай дзейнасці”.
