Зяленскі ўвёў санкцыі супраць беларускага паралімпійца Талая, які абвінавачваецца ў вывазе ўкраінскіх дзяцей

19 лістапада, Позірк. Беларускі паралімпіец Аляксей Талай унесены ў санкцыйны спіс Украіны, вынікае з указа, падпісанага 18 лістапада прэзідэнтам Уладзімірам Зяленскім.

Санкцыі будуць дзейнічаць пяць гадоў і ўключаюць 10 пунктаў, у тым ліку блакаванне актываў, спыненне гандлёвых аперацый, забарону на ўдзел у прыватызацыі, набыццё зямельных участкаў, перадачу тэхналогій, правоў на аб’екты інтэлектуальнай уласнасці.

Абмежавальныя меры закранулі таксама дабрачынны фонд імя Талая. Санкцыі дзейнічаюць тыя ж пяць гадоў і складаюцца з 14 пунктаў: блакаванне актываў, забарона на вывад капіталу з Украіны, аперацый з каштоўнымі паперамі, культурных абменаў, навуковага супрацоўніцтва, адукацыйных і спартыўных кантактаў, дзейнасці на тэрыторыі Украіны ў цэлым і інш.

Народнае антыкрызіснае ўпраўленне (НАУ) абвінавачвае паралімпійца ў незаконным перамяшчэнні ўкраінскіх дзяцей з акупаваных тэрыторый.

У чэрвені НАУ перадало ў Міжнародны крымінальны суд (МУС) дакументы з “доказамі ваенных злачынстваў” рэжыму ў Мінску, у тым ліку па перамяшчэнні дзяцей. У іх акрамя Талая фігуруюць Аляксандр Лукашэнка, дзяржсакратар Саюзнай дзяржавы Дзмітрый Мязенцаў, кіраўнік “Беларуськалія” і член Савета Рэспублікі Іван Галаваты, а таксама дырэктар Данецкай грамадскай арганізацыі для дзяцей-інвалідаў і іх бацькоў “Дэльфіны” Вольга Волкава.

Паводле матэрыялаў НАУ, гэтыя асобы “ўчынілі ваенныя злачынствы”, якія выказаліся ў “незаконным перамяшчэнні ўкраінскіх дзяцей з акупаваных Расіяй тэрыторый у Беларусь і іх пераадукацыі”.

4 кастрычніка кіраўнік НАУ Павел Латушка заявіў, што “толькі з верасня 2022 года па травень 2023-га ў лагер “Дубрава” было дастаўлена не менш за 2.100 украінскіх дзяцей ва ўзросце ад 6 да 15 гадоў з 15 гарадоў Украіны”.

У сакавіку 2023 года МУС выдаў ордэр на арышт Пуціна і расійскага дзіцячага амбудсмэна Марыі Львовай-Бяловай у сувязі з незаконным перамяшчэннем дзяцей з акупаваных РФ тэрыторый Украіны. Беларускія дэмакратычныя сілы дамагаюцца таго, каб суд на тых жа падставах выдаў аналагічны ордэр на згаданых прадстаўнікоў Беларусі.

8 лістапада Пуцін падпісаў указ аб узнагароджанні Талая ордэнам Дружбы “за заслугі ва ўмацаванні дружбы і супрацоўніцтва паміж народамі, плённую дзейнасць па збліжэнні і ўзаемаўзбагачэнні культур нацый і народнасцяў”.

Беларускія ўлады заяўляюць, што прывозяць украінскіх дзяцей на аздараўленне.