Лукашэнка стварыў пры сабе Савет па стратэгічных праектах
Будынак прэзідыума НАНБ
20 лістапада, Позірк. Указам № 357 ад 20 лістапада Аляксандр Лукашэнка стварыў Савет па стратэгічных праектах “пры прэзідэнце”.
Гэта зроблена, як паведамляе яго прэс-служба, для “ўдасканалення дзейнасці па планаванні, распрацоўцы і рэалізацыі стратэгічных праектаў, укараненні ў вытворчасць вынікаў навуковай дзейнасці”.
Галоўнымі задачамі новай адукацыі названы каардынацыя работы па “пошуку і адборы перспектыўных стратэгічных праектаў”, а таксама аналіз іх “актуальнасці, палітычнай і эканамічнай мэтазгоднасці, канкурэнтаздольнасці”, “выпрацоўка прапаноў” аб удасканаленні іх рэалізацыі.
Саветам будзе кіраваць старшыня прэзідыума Нацыянальнай акадэміі навук Уладзімір Гусакоў; яго намеснікі — першы намеснік прэм’ер-міністра Мікалай Снапкоў і памочнік Лукашэнкі Аляксандр Косінец.
У склад уключаны Аляксандр Чарвякоў як міністр эканомікі, хаця 20 лістапада Лукашэнка прызначыў яго амбасадарам у Кітаі.
20 кастрычніка на нарадзе па пытанні ўдасканалення сістэмы планавання і кантролю рэалізацыі стратэгічных праектаў Лукашэнка заявіў аб недахопах у гэтай галіне: “У нас нават калі разумна выпрацаваны праекты стратэгічнага характару, то яны не заўсёды рэалізуюцца”.
“Патрэбны такі цэнтр, які пры прэзідэнце, ад імя прэзідэнта, побач з прэзідэнтам будзе бачыць, што адбываецца, і прымушаць усіх вас рэалізоўваць гэтыя праекты”, — сказаў ён.
30 кастрычніка Чарвякоў паведаміў на тэлеканале “Беларусь 1”, што будаўніцтва “яшчэ аднаго цэлюлознага камбіната” разглядаецца як адзін са стратэгічных праектаў разам са здабычай базальтаў і ўзвядзеннем другой атамнай электрастанцыі.
