Ціханоўская: Школы павінны насіць імёны нашых нобелеўскіх лаўрэатаў, а не рэжымных карнікаў

22 лістапада, Позірк. Беларускія школы “павінны насіць імёны нашых нобелеўскіх лаўрэатаў, а не рэжымных карнікаў”, заявіла 22 лістапада дэмакратычны лідар Святлана Ціханоўская.

Такім чынам яна адрэагавала на навіну пра наданне сталічнай школе № 72 імя палкоўніка міліцыі Уладзіміра Арцёмава — першага камандзіра атрада міліцыі асаблівага прызначэння УУС Мінгарвыканкама.

Назваўшы перайменаванне школы “спробай навязаць дзецям ілжывых герояў”, палітык выказала ўпэўненасць, што дзеці “здольныя мысліць крытычна і мець уласнае меркаванне”. Дэмлідар заклікала неабыякавых настаўнікаў і сем’і падтрымаць іх у гэтым.

Разам з тым Ціханоўская звярнула ўвагу на тое, што многія школы і гімназіі Беларусі названыя “ў гонар сапраўды выбітных людзей — асветніка Францыска Скарыны, пісьменнікаў Івана Мележа і Цішкі Гартнага, мастака Івана Ахрэмчыка, навукоўцаў Жарэса Алфёрава і Васіля Купрэвіча”.

Цырымонія надання сталічнай школе № 72 імя Арцёмава з усталяваннем адпаведнай памятнай дошкі адбылася 17 лістапада.