ПП НС у першым чытанні падтрымала ўвядзенне адмінадказнасці за неданясенне аб здачы жылля іншаземцам

Фота: pixabay.com

22 лістапада, Позірк. Неданясенне органам унутраных спраў інфармацыі аб прадастаўленні жылля іншаземцам, якія часова прыбываюць у Беларусь, будзе цягнуць адміністрацыйную адказнасць.

22 лістапада Палата прадстаўнікоў, як паведамляе яе прэс-служба, у першым чытанні ўхваліла змены ў закон “Аб прававым становішчы замежных грамадзян і асоб без грамадзянства ў Рэспубліцы Беларусь” і Кодэкс аб адміністрацыйных правапарушэннях.

Уносіцца змяненне ў ч. 6 арт. 24.35 КаАП. Інфармаваць органы ўнутраных спраў аб выдзяленні памяшканняў для пражывання іншаземцам павінны юрыдычныя і фізічныя асобы, у тым ліку індывідуальныя прадпрымальнікі.

У пералік памяшканняў для пражывання замежнікаў уключаны жылыя памяшканні, пакоі ў аграэкасядзібах, садовыя домікі, дачы, шматфункцыянальныя памяшканні (бізнэс-апартаменты) і нейкія сродкі размяшчэння. Іншаземцам памяшкання будзе неабходна прадастаўляць на падставе дагавораў найму жылога памяшкання, на аказанне паслуг у сферы аграэкатурызму, арэнды і аплатнага аказання паслуг.

Сцвярджаецца, што прыняцце праекта закона і рэалізацыя яго палажэнняў “дазволяць адаптаваць нормы закона і КаАП да сучасных рэалій, павысіць узровень інфармавання дзяржаўных органаў і забяспечыць своечасовасць паступлення звестак аб суб’ектах, якія прадастаўляюць для пражывання замежнікам жылыя памяшканні, а таксама аб саміх іншаземцах, якія часова знаходзяцца ў Рэспубліцы Беларусь, у тым ліку тых, якія не падлягаюць у адпаведнасці з заканадаўствам рэгістрацыі на тэрыторыі нашай краіны”.

Беларускія ўлады неаднаразова заяўлялі, што Захад і Украіна рыхтуюць напад на краіну. У савецкія часы сувязі з замежнікамі старанна адсочваліся і караліся. Да такой практыкі пакуль часткова вярнуўся і дзейны рэжым. У 2012 годзе быў затрыманы рыэлтар Сяргей Башарымаў, які здаў кватэру ў Мінску шведам, якія арганізавалі “плюшавы дэсант”: на лёгкаматорным самалёце яны перасеклі літоўска-беларускую мяжу, дабраліся да ўскраіны сталіцы і скінулі плюшавых мішак з лозунгамі ў абарону свабоды слова. Башарымава і студэнта Антона Сурапіна, які сфатаграфаваў цацкі, абвінавацілі ў дапамозе шведам у перасячэнні мяжы. Пасля абодвух адпусцілі, крымінальны пераслед быў спынены.