Працягнута адхіленне беларускіх і расійскіх баскетбольных зборных і клубаў ад удзелу ў міжнародных турнірах
29 лістапада, Позірк. Выканаўчы камітэт Міжнароднай федэрацыі баскетбола (ФІБА) 28 лістапада прадоўжыў на перыяд да наступнага пасяджэння Цэнтральнага савета (ЦС) арганізацыі рашэнне аб адхіленні беларускіх і расійскіх зборных і клубаў ад спаборніцтваў пад сваёй эгідай.
Гаворка ідзе аб рашэнні ЦС ФІБА, тэрмін якога скончыўся 27 лістапада. Чарговае пасяджэнне гэтага органа адбудзецца ў 2024 годзе.
19 траўня стала вядома, што беларускія і расійскія клубы не змогуць заявіцца для ўдзелу ў міжнародных турнірах пад эгідай еўрапейскага аддзялення Міжнароднай федэрацыі баскетбола (ФІБА-Еўропа).
У рашэнні Савета арганізацыі ад 18 траўня было ўказана, што каманды з гэтых краін “не маюць права рэгістравацца для ўдзелу ў маючым адбыцца сезоне клубных спаборніцтваў 2023–2024 гадоў, такіх як Кубак Еўропы ФІБА, Еўраліга сярод жанчын і Еўракубак сярод жанчын”.
21 красавіка стала вядома, што выканаўчы камітэт ФІБА-Еўропа аднагалосна прыняў рашэнне не дапускаць мужчынскія зборныя Беларусі і Расіі да кваліфікацыі Еўрабаскета-2025, якая пройдзе ў ліпені – жніўні гэтага года.
1 сакавіка 2022 года чатыры беларускія клубы — мужчынскія “Цмокі” (Мінск) і “Барысфен” (Магілёў), жаночыя “Гарызонт” (Мінск) і “Алімпія” (Гродна) — былі выключаны са спаборніцтваў у еўрапейскіх клубных лігах.
18 траўня таго ж года выканкам ФІБА забараніў праводзіць свае спаборніцтвы на тэрыторыі Беларусі і РФ, а таксама выключыў каманды гэтых краін са сваіх турніраў. Беларускія зборныя адхілілі ад удзелу ў адборачных матчах мужчынскага ЧС-2023, жаночага ЧС-2022, ЧС сярод дзяўчат (U-17), а таксама мужчынскіх і жаночых турнірах у фармаце 3х3.
28 лютага 2022-га, праз чатыры дні пасля поўнамаштабнага ўварвання расійскай арміі на тэрыторыю Украіны, Міжнародны алімпійскі камітэт заклікаў міжнародныя спартыўныя федэрацыі не дапускаць да спаборніцтваў атлетаў з Расіі і Беларусі. Гэтая рэкамендацыя была неадкладна і масава прынята да выканання.
28 сакавіка гэтага года па выніках пасяджэння выканкама ў Лазане (Швейцарыя) МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах.
Пры гэтым павінен быць выкананы шэраг умоў. Беларускія і расійскія атлеты змогуць спаборнічаць “у якасці індывідуальных нейтральных спартсменаў” (без выкарыстання сцяга, гімна і сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.
Рэкамендацыя МАК не распаўсюджваецца на камандныя віды спорту, паколькі “каманды атлетаў з расійскім або беларускім пашпартам не разглядаюцца”.