Маці дарадцы Ціханоўскай па моладзевай палітыцы і студэнцтву арыштавалі на 15 сутак

1 снежня, Позірк. Маці Маргарыты Ворыхавай, дарадцы дэмакратычнага лідара Святланы Ціханоўскай па моладзевай палітыцы і справах студэнтаў, Інэсу Ворыхаву арыштавалі на 15 сутак, паведамляюць праўладныя тэлеграм-каналы.

Паводле іх, пакаранне прызначылі ў якасці “папярэджання” за “рассылкі і рэпосты” — і што “калі яна не зразумее, то атрымае крыміналку”.

Верагодна, жанчыну асудзілі паводле арт. 19.11 КаАП (распространение, изготовление, хранение, перевозка информационной продукции, содержащей призывы к экстремистской деятельности или пропагандирующей такую деятельность).

Інэсу Ворыхаву затрымаў АМАП раніцай 30 лістапада ў Наваполацку (Віцебская обласць) на працы.

Маргарыта Ворыхава 9 лістапада ў Бруселі атрымала прэмію “Маладая жанчына Еўропы 2023”.

Паводле інфармацыі прэс-службы Ціханоўскай, гэта ўзнагарода па адной з чатырох намінацый прэміі “Жанчына Еўропы”, якая штогод уручаецца за прасоўванне еўрапейскіх каштоўнасцяў. Ворыхава прысвяціла прэмію ўсім маладым лідарам Беларусі, адзначыўшы іх “вырашальную ролю ў фармаванні будучыні і абароне дэмакратыі”.

Ворыхава абвясціла, што ў студзені далучыцца да Кансультатыўнай рады па справах моладзі пры Савеце Еўропы.

Ціханоўская прызначыла Ворыхаву сваёй дарадцай 6 жніўня 2023 года.