МЗС назвала “рытуальнымі танцамі” новыя санкцыі ЗША супраць Мінска

6 снежня, Позірк. Увядзенне ЗША новых санкцый супраць Мінска “ўжо стала штодзённасцю, нейкімі рытуальнымі танцамі для сябе і сваіх адэптаў і паслугачоў, якія ўцяклі з Беларусі”, заявіў 6 снежня прэс-сакратар Міністэрства замежных спраў Анатоль Глаз.

Паводле яго слоў, Вашынгтон “ператварыў сваю дыпламатыю і адносіны з іншымі краінамі ў набор мер ціску, рэкету і шантажу” і адзначыў, што па віне ЗША “мы сёння і назіраем вострыя супярэчнасці ў шэрагу рэгіёнаў зямнога шара”.

“Аднабаковыя санкцыі — прымітыўныя і незаконныя метады прымусу, спроба падпарадкаваць іншую дзяржаву сваёй волі. Таму кожны чарговы так званы пакет з’яўляецца грубым парушэннем міжнароднага права з боку ЗША. За гэта, вядома ж, рана ці позна давядзецца несці адказнасць”, — заявіў Глаз.

Прадстаўнік МЗС перакананы: “Беларусы выдатна разумеюць, што сапраўдная мэта санкцый ЗША супраць суб’ектаў гаспадарання — пагоршыць умовы жыцця і дзейнасці працоўных калектываў, простых людзей, абцяжарыць выкананне прадпрыемствамі сацыяльных абавязацельстваў”.

“Санкцыі ў дачыненні да беларускіх прадпрыемстваў неэфектыўныя, а часам маюць і зваротны эфект”, — сказаў Глаз, дадаўшы, што “любая спроба гаварыць з Беларуссю з пазіцыі дыктату першапачаткова асуджаная на правал”.

“Асабняком гэтым разам стаяць, вядома, персанальныя санкцыі ў дачыненні да [генеральнага сакратара Беларускага Чырвонага Крыжа] Дзмітрыя Шаўцова. Чалавек займаецца гуманітарнай дзейнасцю, аказвае дапамогу, садзейнічае аздараўленню дзяцей з зон канфлікту ў нашай спакойнай краіне. Так што адыёзнасць гэтага кроку Вашынгтона цалкам відавочная”, — рэзюмаваў прэс-сакратар знешнепалітычнага ведамства.

5 снежня ЗША ўвялі новыя санкцыі супраць беларускіх фізічных і юрыдычных асоб: кіраўніка прадпрыемства “Белмытнясэрвіс” Вадзіма Бабарыкіна, дырэктара ААТ “Зеніт-БелОМА” Мікалая Гайчука, гендырэктара “БелОМА” Аляксандра Мароза, прадпрымальнікаў Віктара Пятровіча (дырэктар ТАА “Тытунь-Інвест”), Аляксандра Шакуціна (старшыня савета дырэктараў ААТ “Амкадор”), Паўла Тапузідзіса (“Тытунь-Інвест”), дырэктара навукова-тэхнічнага цэнтра “ЛЭМТ” БелОМА Аляксея Шкадарэвіча, генеральнага сакратара Беларускага Чырвонага Крыжа Дзмітрыя Шаўцова.

У спіс кампаній, уключаных у новы пакет амерыканскіх санкцый, унесеныя канцэрн “Беллеспаперапрам”, Мінскі механічны завод імя Вавілава, ААТ “Зеніт-БелОМА” і навукова-тэхнічны цэнтр “ЛЭМТ” БелОМА, кіруючая кампанія холдынгу “Гарызонт”, навукова-вытворчы холдынг дакладнага машынабудавання “Планар”, холдынг “Беларуская цэментная кампанія”, “Белмытсэрвіс”, “Тытунь-Інвест”.

Дэмакратычны лідар Святлана Ціханоўская, якая ў рамках стратэгічнага дыялогу з ЗША цяпер знаходзіцца з візітам у гэтай краіне, заклікала Вашынгтон зрабіць больш жорсткімі санкцыі ў дачыненні да беларускіх уладаў і пазбавіць іх магчымасці абыходзіць абмежаванні. Першы раўнд стратэгічнага дыялогу праходзіць 6–7 снежня.