Лукашэнка ўзнагародзіў сваю нявестку медалём Скарыны

18 красавіка, Позірк. Дзяржаўных узнагарод і падзяк удастоена больш за 60 прадстаўнікам розных сфер дзейнасці, паведамляе прэс-служба Аляксандра Лукашэнкі. Сярод тых, хто атрымаў медаль Францыска Скарыны, яго малодшая нявестка Ганна Лукашэнка, пазначаная ў рэлізе як “генеральны прадзюсар“.

Гэта жонка яго сярэдняга сына Дзмітрыя.

Ганна Лукашэнка была кіраўніком рабочай групы ” рэспубліканскай грамадска-культурнай акцыі “Марафон адзінства“ — серыі прапагандысцкіх канцэртаў і іншых мерапрыемстваў да прэзідэнцкіх выбараў 2025 года.

Напярэдадні Дня Перамогі ў розных гарадах праходзіць канцэрт-рэквіем “кожны трэці“, генеральным прадзюсарам якога яна з’яўляецца.

Пад псеўданімам Ганна Сялук піша тэксты поп-песень, у тым ліку прапагандысцкіх.

Медалём Францыска Скарыны ўзнагароджваюцца работнікі навукі, адукацыі і культуры за “выдатныя дасягненні ў прафесійнай дзейнасці, значны асабісты ўклад у развіццё і памнажэнне духоўнага і інтэлектуальнага патэнцыялу, культурнай спадчыны беларускага народа“.

Узнагарода заснаваная ў 1989 годзе.