Дзярждэпартамэнт ЗША: Да вызвалення палітвязняў змякчэння санкцый і паляпшэння адносін з Мінскам не будзе

6 снежня, Позірк. Злучаныя Штаты не змякчаць санкцыі ў дачыненні да Мінска, пакуль не будуць вызваленыя ўсе палітвязні. Пра гэта заявіў беларускім журналістам прэс-сакратар Дзярждэпартамента ЗША Мэцью Мілер 6 снежня на брыфінгу ў Вашынгтоне.

Падкрэсліўшы, што 6–7 снежня ў сталіцы ЗША праходзіць першы стратэгічны дыялог з беларускімі дэмакратычнымі сіламі, Мілер адзначыў: “Мы рады вітаць Святлану Ціханоўскую ў Дзярждэпартаменце”.

Ён нагадаў, што 5 снежня офіс кантролю за замежнымі актывамі Казначэйства ЗША ўвёў санкцыі ў дачыненні да 19 фізічных і юрыдычных асоб, якія “падтрымліваюць рэжым Лукашэнкі, працуюць у беларускім абаронным сектары і падтрымліваюць Расію ў яе ваеннай агрэсіі супраць Украіны”.

“Гэта апошнія на дадзены момант нашы намаганні па прыцягненні да адказнасці беларускага рэжыму, — сказаў ён. — І наша пасланне Лукашэнку і тым, хто праводзіць рэпрэсіі, яснае і дакладнае: мы не будзем казаць аб змене нашай палітыкі, змякчэнні санкцый і паляпшэнні нашых адносін, пакуль рэжым не вызваліць усіх палітвязняў, не спыніць рэпрэсіі ў дачыненні да беларускага народа і не перастане браць удзел у расійскай вайне супраць Украіны”.

Гл. таксама:

ЗША ўвялі санкцыі супраць шэрагу беларускіх фізічных асоб і кампаній