Амерыканскія партнёры праявілі павышаную ўвагу да прапаноў аб дапамозе палітвязням — сястра Калеснікавай

7 снежня, Позірк. Амерыканскія партнёры ведаюць колькасць палітвязняў у Беларусі і ўмовы іх утрымання, сочаць за сітуацыяй. Пра гэта паведаміла журналістам сябра Каардынацыйнай рады Таццяна Хоміч, сястра палітзняволенай Марыі Калеснікавай.

6 снежня ў Вашынгтоне яна ўзяла ўдзел у абмеркаванні становішча палітвязняў у Беларусі, якое адбылося ў рамках першага дня стратэгічнага дыялогу паміж ЗША і беларускімі дэмакратычнымі сіламі.

Паводле яе слоў, беларускі бок шмат гаварыў аб тым, што палітвязні не атрымліваюць неабходнай медыцынскай дапамогі і ў шэрагу выпадкаў гэта прывяло да іх смерці. Палівязні, якія ўжо вызваліліся, часта маюць патрэбу ў сур’ёзнай рэабілітацыі, аднак наяўнай дапамогі недастаткова. “Гэта патрабуе падтрымкі ініцыятыў, якія зараз надаюць такую дапамогу, таму што праблема насамрэч для нас глабальная, а сістэмных праграм рэабілітацыі няма. Яны ўсе кропкавыя ў розных краінах”, — заявіла Хоміч.

Паводле яе слоў, на сустрэчы ўзнімалася пытанне аб тым, што беларускія праваабарончыя арганізацыі, а таксама арганізацыі, якія падтрымліваюць палітвязняў, пакуль не могуць дапамагчы ўсім. “І ў гэтай сітуацыі нашыя прапановы якраз былі аб тым, каб дапамагчы распрацаваць праграму рэабілітацыі, праграму падтрымкі палітвязняў, у тым ліку каб мы маглі яе маштабаваць. Паколькі ў нас няма досведу ў гэтым кірунку, вядома, нам патрэбная дапамога з боку ЗША”, — сказала сястра палітзняволенай.

Яна адзначыла, што канкрэтныя рашэнні пакуль не прынятыя, аднак амерыканскія партнёры праявілі “падвышаную ўвагу” да вылучаных прапаноў. “Я думаю, што мы можам разлічваць на падтрымку ў гэтым напрамку”, — адзначыла Хоміч.

Гл. таксама па тэме:

Гарбунова: Дэмсілы прапануюць ЗША стварыць працоўную групу па пытанні палітвязняў у Беларусі