ЕАБР: ЗВР Беларусі выраслі за кошт падвышэння цэн на золата

11 снежня, Позірк. Міжнародныя рэзервовыя актывы Беларусі выраслі за кошт падвышэння цэн на золата, канстатавалі аналітыкі Еўразійскага банка развіцця (ЕАБР) у штотыднёвым макраэканамічным аглядзе.

З пачатку года, адзначаюць эксперты, ЗВР выраслі на 326 млн долараў, пры гэтым кошт золата ў іх складзе павялічыўся на 383 млн.

Паводле даных Нацбанка, на 1 снежня 2023 года золатавалютныя рэзервы склалі 8 млрд 256 млн долараў у эквіваленце.

За лістапад ЗВР выраслі на 108,7 млн долараў (+1,3%).

На 1 студзеня ЗВР складалі 7 млрд 929,5 млн долараў, 1 лютага — 8 млрд 142,8 млн, 1 сакавіка — 7 млрд 769,5 млн, 1 красавіка — 8 млрд 98,6 млн, 1 траўня — 7 млрд 968,2 млн, 1 чэрвеня — 7 млрд 872,1 млн, 1 ліпеня — 7 млрд 791,5 млн, 1 жніўня — 7 млрд 973,5 млн, 1 верасня — 7 млрд 991,2 млн, 1 кастрычніка — 7 млрд 925 млн, 1 лістапада — 8 млрд 147,1 млн.

На канец гэтага года ЗВР павінны скласці не менш за 6 млрд долараў. Такі паказчык замацаваны ва ўказе № 412 ад 28 лістапада 2022 года “Аб зацвярджэнні Асноўных напрамкаў грашова-крэдытнай палітыкі Рэспублікі Беларусь на 2023 год”.