Прыняты бюджэт Саюзнай дзяржавы на 2024 год з’яўляецца прафіцытным, больш за палову даходаў фармуе РФ

18 снежня, Позірк. Парламенцкі сход Саюза Беларусі і Расіі прыняў 18 снежня ў Маскве бюджэт Саюзнай дзяржавы (СД) на 2024 год, паведамляе ТАСС са спасылкай на прэс-службу Парламенцкага сходу.

Ён з’яўляецца прафіцытным. Даходы зацверджаны ў памеры 6 млрд 970,1 млн (тут і далей — расійскіх) рублёў, што складае прыкладна 77,7 млн долараў ЗША паводле актуальнага афіцыйнага курсу Цэнтрабанка Расіі, выдаткі — 5 млрд 722,2 млн рублёў (63,8 млн долараў) .

Больш за палову даходаў (4 млрд 5,27 млн рублёў, альбо 44,7 млн долараў) павінна быць сфарміравана за кошт адлічэнняў з расійскага бюджэту, адлічэнні беларускага боку запланаваны ў памеры 2 млрд 156,68 млн рублёў (каля 24 млн долараў). Акрамя таго, у бюджэт будуць уключаны даходы, атрыманыя дзяржустановай “Тэлерадыёвяшчальная арганізацыя Саюзнай дзяржавы”, а таксама сродкі бюджэтаў СД, якія захаваліся з мінулых гадоў. Іх агульная сума склала 808,15 млн рублёў (прыкладна 9 млн долараў).

Што датычыцца расходнай часткі бюджэту, то тут сродкі плануецца накіраваць на фінансаванне пяці праграм і 37 мерапрыемстваў СД. Удакладняецца, што ў пералік увайшлі праграмы ўдасканалення аб’ектаў ваеннай інфраструктуры, якія плануюцца да сумеснага выкарыстання ў інтарэсах забеспячэння рэгіянальнай групоўкі войскаў дзвюх краін. Частку сродкаў плануецца патраціць на “развіццё пагранічнай бяспекі СД”.

За кошт прафіцыту бюджэту, які складзе 1 млрд 247,9 млн рублёў (каля 13,9 млн долараў) “могуць быць прафінансаваны новыя праграмы, праекты і мерапрыемствы СД пасля іх зацвярджэння Саветам міністраў Саюзнай дзяржавы”, удакладнілі ў прэс-службе.

Спікер Дзярждумы Вячаслаў Валодзінаадзначыў, што агульны памер бюджэту СД у параўнанні з мінулым годам вырас на 38%, што, на яго думку, “кажа аб тым, што фармат Саюзнай дзяржавы эфектыўны”.

У адпаведнасці з палажэннямі дагавора аб стварэнні Саюзнай дзяржавы прыняты Парламенцкім сходам бюджэт будзе ўнесены на зацвярджэнне ў Вышэйшы дзяржаўны савет СД.