У вясковым доме экс-кандыдата ў прэзідэнты Мілінкевіча адбыўся ператрус
Апячатаныя дзверы ў доме Мілінкевіча
18 снежня, Позірк. У вясковым доме экс-кандыдата ў прэзідэнты на выбарах 2006 года Аляксандра Мілінкевіча адбыўся ператрус.
З сёлетняга верасня 76-гадовы Мілінкевіч — пазаштатны дарадца Святланы Ціханоўскай па пытаннях еўрапейскага выбару Беларусі. Таксама ён канцлер Вольнага беларускага ўніверсітэта.
Ператрус адбыўся ў доме “на радзіме продкаў у Берштах, што ў Гродзенскай пушчы, сёння гэта на мяжы з Літвою”, паведаміў Мілінкевіч. Дзверы ў доме апячатаныя.
“Ператрусы адбываюцца па месцы рэгістрацыі, я зарэгістраваны ў Берштах, натуральна, што туды прыйшлі. Ведаюць, што я за мяжой. Напэўна, у доме зламалі дзверы — наўрад ці яны маюць адмычкі, — і пазней “абклеілі” іх. Што адбывалася ўнутры, не ведаю”, — сказаў “Позірку” Мілінкевіч.
Паводле яго слоў, пра ператрус “паведамілі мясцовыя людзі, добрыя адносіны амаль з усімі”. Іншыя падрабязнасці, у тым ліку калі гэта здарылася, невядомыя. Палітык лічыць тое, што здарылася, часткай чарговай масавай хвалі ператрусаў, якая цяпер адбываецца ў Беларусі.
“Не так важна, па якім артыкуле [Крымінальнага кодэкса] я іду. Можна ж напісаць, што “ён хацеў у касманаўты”. Сціснуў зубы і спрабую проста гэта перажыць. Я ж чакаў, што гэта можа быць, асабліва пасля таго, як было агучана, што я дарадца Святланы Ціханоўскай”, — дадаў Мілінкевіч.
Ён адзначыў, што ў гэтай сітуацыі “безабароннасць — самае балючае”, можна толькі назіраць. “Месца дарагое, дзяды-прадзеды, родны кут, малая радзіма. Маё сэрца ў Берштах”, — сказаў палітык.
