Мілінкевіч будзе пазаштатным дарадцам Ціханоўскай па пытаннях еўрапейскага выбару Беларусі

7 верасня, Позірк. Дапамагаць наладжваць сувязі паміж демакратычнай Беларуссю і Еўропай у якасці пазаштатнага дарадцы Святланы Ціханоўскай будзе Аляксандр Мілінкевіч, паведамляе прэс-служба офіса дэмакратычнага лідара.

“Адна з галоўных мэтаў — узмацніць інтэграцыю беларускай культуры ў еўрапейскую, часткай якой яна заўсёды з’яўлялася”, — адзначаецца ў паведамленні.

76-гадовы Аляксандр Мілінкевіч — беларускі навуковец, грамадскі дзеяч, палітык, канцлер Вольнага беларускага ўніверсітэта. 

У кастрычніку 2005 года на Кангрэсе дэмакратычных сіл быў абраны “адзіным кандыдатам ад дэмакратычных сіл”, у гэтым статусе ўдзельнічаў у выбарах прэзідэнта Беларусі ў 2006 годзе. На іх, паводле афіцыйных звестак, набраў 6% галасоў выбаршчыкаў і заняў другое месца пасля Аляксандра Лукашэнкі.

У 2006 годзе быў узнагароджаны Еўрапарламентам прэміяй імя Андрэя Сахарава “За свабоду думкі”.