Зніклыя ў Браслаўскім раёне дзеці знойдзены

20 верасня, Позірк. Аб выяўленні двух дзяцей, зніклых у Браслаўскім раёне, паведамляе УУС Віцебскага аблвыканкама.

Адзначаецца, што “іх жыццю і здароўю нічога не пагражае”.

Міліцыя падзякавала “ўсім” за дапамогу ў пошуках.

Вышук жыхароў вёскі Чарніцы Ступеня Міхаіла Анатольевіча (2012 года нараджэння) і Марцінкевіча Арсенія Аляксеевіча УУС абвясціла раніцай 20 верасня.

Адзначалася, што 19 верасня каля 21:00 яны “пакінулі месца жыхарства”.

“Дзеці выхоўваюцца ў прыёмнай сям’і. Напярэдадні выказвалі свае намеры з’ехаць да сябра ў Верхнядзвінск”, — гаварылася ў паведамленні.

У сутачнай зводцы Міністэрства па надзвычайных сітуацыях паведамлялася таксама аб знікненні двух дзяцей у Мінскім раёне. Адзначалася, што напярэдадні вечарам падлеткі 2014 і 2016 г.н. зніклі каля вёскі Бараўляны. Яны былі знойдзеныя 20 верасня ў 07:35 супрацоўнікамі міліцыі.

Пошукава-ратавальны атрад “Анёл” паведаміў, што “з дзецьмі ўсё добра”.