ДАІ затрымала ноччу ў Гомелі 17-гадовага кіроўцу — перавышаў хуткасць, правоў не мае, аўтамабіль падарылі бацькі

20 верасня, Позірк. Пра затрыманне ў Гомелі 17-гадовага кіроўцы паведамляе Дзяржаўтаінспекцыя Гомельскай вобласці.

Падлетак затрыманы ноччу (дата не ўказана) на аўтадарозе Р-150 Гомель — Хутар. Адзначаецца, што інспектары ДАІ спынілі аўтамабіль “Хюндай”, які “значна перавышаў устаноўленую хуткасць”.

“Пасведчання кіроўцы ён не мае і ніколі яго не атрымліваў. Высветлілася, што малады чалавек ужо прайшоў навучанне ў аўташколе, аднак экзамен у ДАІ яшчэ не здаваў — па ўзросце. Разам з тым бацькі ўжо паспелі купіць яму ўласны аўтамабіль, зарэгістраваўшы яго на бацьку”, — гаворыцца ў паведамленні.

У дачыненні да кіроўцы складзены пратакол аб адміністрацыйным правапарушэнні, матэрыялы накіраваныя ў камісію па справах непаўналетніх.

“Бацька як уладальнік транспартнага сродку прыцягнуты да адказнасці за перадачу кіравання асобе, якая загадзя не мае правоў”, — адзначае ДАІ.

Дзяржаўтаінспекцыя заклікала бацькоў не купляць дзецям “дарослыя цацкі раней часу”, папярэдзіўшы аб адказнасці.