19 верасня, Позірк. Кандыдатуру Таццяны Лукаянавай на пасаду прадстаўніка Аб’яднанага пераходнага кабінета (АПК) па сацыяльнай палітыцы вылучыла фракцыя Каардынацыйнай рады (КР) “Беларусы дзеяння”.
Лукаянава была ў ліку 12 чалавек, якія ўваходзілі ў выбарчы спіс Блока беларускіх палітвязняў “Беларусы дзеяння” на выбарах у КР 4-га склікання. Ва выніках галасавання сёлета ў траўні блок атрымаў чатыры мандаты і сфармаваў аднайменную фракцыю. Лукаянава ў лік дэлегатаў не трапіла.
Фракцыя адзначае, што Лукаянава “мае больш за 25 гадоў прафесійнага досведу ў адукацыі, бізнесе, кіраванні, медычным сектары і сферы безнаяўных разлікаў”.
“На працягу 11 гадоў яна працавала адміністратаркай у медычным цэнтры, раней кіравала ўласным бізнесам і працавала ў сферы продажаў і арганізацыі працы, — гаворыцца ў паведамленні. — Пасля 2020 году значную частку яе жыцця заняла грамадская дзейнасць: дваровая самаарганізацыя, узаемадапамога, падтрымка людзей, якія пацярпелі ад рэпрэсій, палітычных зняволеных і іх сем’яў. Рэпрэсіі закранулі і яе асабіста. Таццяна прайшла праз затрыманні, страціла працу і ў 2024 годзе была вымушаная пакінуць Беларусь. Сёння яна працягвае працаваць з людзьмі, якія прайшлі праз палітычны перасьлед, у тым ліку як ментарка ініцыятывы “Вольныя”.
Адзначаецца, што Лукаянава прапануе засяродзіць працу прадстаўніцтва АПК па сацпалітыцы на “падтрымцы палітычных зняволеных, вызваленых і іх сем’яў”, “медычнай і псіхалагічнай рэабілітацыі ахвяр рэпрэсій”, “дапамозе беларусам у вымушанай эміграцыі”, “працаўладкаванні, перанавучанні і вяртанні людзей да самастойнага жыцця”, “супрацы з беларускімі грамадскімі арганізацыямі, бізнесам і міжнароднымі партнёрамі”, “падрыхтоўцы мадэляў сацыяльнай рэабілітацыі для будучай дэмакратычнай Беларусі”.
“Асобны прынцып яе праграмы — не ствараць яшчэ адну структуру, якая дублюе ўжо існыя беларускія ініцыятывы, а злучаць іх магчымасці і выкарыстоўваць палітычны статус АПК для вырашэння праблем, якія патрабуюць інстытуцыйнага або міжнароднага ўзроўню”, — падкрэсліла фракцыя.
Раней паведамлялася, што “Кааліцыя Латушка і Рух “За Свабоду” у КР вылучыла кандыдатуру Веранікі Станкевіч на пасаду прадстаўніка АПК па сацыяльнай палітыцы, а група з дзевяці дэлегатаў, якія ўваходзяць у розныя фракцыі, — кандыдатуру Юліі Міцкевіч (зараз — в.а. прадстаўніка па сацпалітыцы, да таго — намесніца прадстаўніка).
Да 9 жніўня 2026 года профільнае прадстаўніцтва АПК ачольвала Вольга Зазулінская. Цяпер яна кіруе Місіяй дэмакратычных сіл Беларусі ў Кіеве. Былая кіраўніца місіі Святлана Шаціліна абраная ў КР.
Аўтарызавацца
Забыліся пароль?
Выхад з профілю
