КР: Эфектыўнасць санкцый і магчымасць кампрамісаў — шляхі вызвалення палітвязняў

19 снежня, Позірк. Вызваленне палітвязняў, наданне сацыяльнай дапамогі ім і іх сем’ям з’яўляюцца аднымі з “найважнейшых і прыярытэтных задач дэмакратычных сіл Беларусі”, заявіла Каардынацыйная рада па ўрэгуляванні палітычнага крызісу (КР) у рэзалюцыі, апублікаванай па выніках слуханняў “Вызваленне палітвязняў Беларусі” 2 і 3 снежня ў Варшаве.

У дакуменце адзначаецца, што вызваленне палітвязняў “павінна адбыцца незалежна ад складанасці палітычнай і эканамічнай сітуацыі ў Беларусі”.

“Грамадскасць не мае маральнага права судзіць палітычных зняволеных за выбар імі сродкаў вызвалення і даваць ім ацэнку, — мяркуе КР. — Толькі кансалідаваныя намаганні ўсіх палітычных сіл пры дапамозе міжнародных арганізацый і ўрадаў іншых краін з’яўляюцца абавязковай і неабходнай умовай вырашэння праблем вызвалення палітвязняў ва ўмовах узмацнення рэпрэсій у краіне”.

Падчас абмеркавання КР вылучыла тры стратэгіі вызвалення палітвязняў: павышэнне эфектыўнасці санкцый і ўзмацненне ціску на рэжым; гуманітарны кірунак і перамоўны працэс; магчымасць кампрамісаў, калі яны не ставяць пад пагрозу жыццё людзей і не пагражаюць тэрытарыяльнай цэласнасці і незалежнасці беларускай дзяржавы.

У рэзалюцыі дэлегаты КР адзначылі наяўнасць разыходжанняў у фракцый “у ацэнцы перамоўнай пазіцыі рэжыму, яго гатоўнасці аслабіць рэпрэсіі і г.д.” і рэкамендавалі выкарыстоўваць “комплексны падыход” па вызваленні палітвязняў, які ўключае ў сябе: выкарыстанне санкцый; падрыхтоўку спісаў і правядзенне катэгарызацыі палітвязняў; складанне спісаў злачынцаў рэжыму, прымяненне мер па абмежаванні іх правоў і выкарыстанне інструмента універсальнай юрысдыкцыі; пошук кантактаў і прадстаўнікоў рэжыму, папярэдняе вызначэнне патрабаванняў і ўмоў бакоў; вызначэнне кірунку міжнароднай дзейнасці КР па праблеме палітвязняў; кансультаванне міжнародных партнёраў, прадстаўнікоў, сумесная распрацоўка і пастаноўка перамоўнага працэсу па вызваленні палітвязняў; арганізацыю перамоўнай пляцоўкі і пастаяннай гуманітарнай місіі па абмене палітвязнямі; фармаванне рабочай групы па каардынацыі стратэгій і сцэнарыяў вызвалення палітвязняў (дэмсілы, праваабарончыя арганізацыі, грамадзянскія ініцыятывы, экспертная супольнасць).

16 снежня дзевяць членаў КР запатрабавалі роспуску яго цяперашняга складу. Аўтары заклікалі іншых дэлегатаў другога складу КР датэрмінова скласці паўнамоцтвы,”нацыянальнага лідара Святлану Ціханоўскую, спікера Каардынацыйнай рады Андрэя Ягорава, віцэ-спікера Алену Жываглод, прадстаўнікоў Аб’яднанага пераходнага кабінета — стварыць групу з прафесіяналаў і экспертаў для фармавання трэцяга складу Каардынацыйнай рады і прыняцця ўзгодненага палажэння аб выбарах у яго трэці склад у адпаведнасці са статутам у выніку бяспечнага, простага і тайнага галасавання ўсіх грамадзян Беларусі”.

Петыцыю падпісалі дэлегаты Радзівон Бегляк, Дар’я Дзергачова, Уладзімір Жыгар, Арцём Лядоўскі, Ірына Маклейн, Галіна Мацюшына, Міхаіл Рубін, Міхаіл Таўбэ, Алена Турава.

8 снежня быў апублікаваны праект сістэмы выбараў у КР. Прапанавана прапарцыйная выбарчая сістэма з закрытымі спісамі выбарчых суб’ектаў. 15% месцаў (18 мандатаў са 120) прадугледжана для дэлегатаў ад арганізацый грамадзянскай супольнасці. “Гэтыя месцы займаюцца на аснове выбараў сярод арганізацый грамадзянскай супольнасці”, — гаворыцца ў праекце.

28 лістапада прайшла хваля ператрусаў па месцы беларускай рэгістрацыі і ў сваякоў прадстаўнікоў дэмакратычных сіл Беларусі, звязаных з КР. Паводле інфармацыі МУС, праведзена больш за 130 ператрусаў, вынесена 145 пастаноў аб арышце маёмасці.

Следчы камітэт паведаміў, што па справе ў якасці падазраваных праходзіць больш за 100 чалавек. Ім інкрымінуюцца ч. 1 арт. 357 (змова ці іншыя дзеянні з мэтай захопу дзяржаўнай улады) і ч. 3 арт. 361¹ (стварэнне экстрэмісцкага фармавання альбо ўдзел у ім) Крымінальнага кодэкса.