Праваабаронцы прызналі палітвязнямі яшчэ 15 чалавек, у тым ліку экс-пракурора Эльдара Сафарава
23 снежня, Позірк. Беларускія праваабарончыя арганізацыі прызналі палітычнымі зняволенымі яшчэ 15 чалавек, вынікае з супольнай заявы, апублікаванай на сайце цэнтра “Вясна”.
Адпаведны статус атрымалі фігуранты спраў паводле арт. 293 КК (масавыя беспарадкі):
- Сяргей Ботвіч (5 гадоў пазбаўлення волі ва ўмовах узмоцненага рэжыму),
- Павел Нявыглас (1 год і 2 месяцы пазбаўлення волі),
- Кірыл Мацюта (прыгавораны да заключэння ва ўмовах узмоцненага рэжыму, тэрмін невядомы),
- Арцём Янкоўскі (выстаўлена абвінавачанне),
- Максім Варнель (выстаўлена абвінавачанне);
паводле ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх):
- Юрый Дабрахотаў (прыгавораны да 2 гадоў зняволення, дадаткова быў абвінавачаны ў захаванні марыхуаны паводле ч. 1 арт. 328 КК),
- Аляксандр Лыкшын (пра затрыманне стала вядома на пачатку снежня, быў названы адным са стваральнікаў сэрвісу “Письмо.бел” і ўдзельнікам пратэстаў, дакладны статус невядомы),
- Уладзімір Лыкшын (брат Аляксандра Лыкшына, дакладны статус невядомы),
- Ганна Чаркас (статус невядомы),
- Тамара Астрэйка (выстаўленае абвінавачанне),
- Ларыса Катовіч (статус невядомы),
- Ксенія Рыжык (статус невядомы),
- Кацярына Цэван (статус невядомы),
- Эльдар Сафараў (затрыманы на мінулым тыдні разам з жонкай у рамках крымінальнай справы; у 2010 годзе быў абвінаваўцам у справе палітвязня Мікалая Аўтуховіча, звольніўся ўвосень 2020 года на хвалі грамадска-палітычных падзей),
- Юлія Станкевіч (жонка Сафарава, адвакат).
Праваабаронцы патрабуюць ад уладаў неадкладна вызваліць іх, а таксама ўсіх грамадзян, затрыманых “у сувязі з рэалізацыяй свабоды мірных сходаў у поствыбарчы перыяд”, і спыніць рэпрэсіі.
Апрача “Вясны” заяву падпісалі Беларускі Хельсінкскі камітэт, Беларускі дом правоў чалавека імя Барыса Звозскава, Офіс па правах людзей з інваліднасцю, Беларуская асацыяцыя журналістаў, “Прававая ініцыятыва”, Human Constanta.
Цяпер у Беларусі 1.499 палітвязняў.
