Ціханоўская: Праблема “літвінізму” створана штучна, пераважная большасць беларусаў увогуле не чула пра гэта

23 жніўня, Позірк. Праблема “літвінізму” створана штучна, пераважная большасць беларусаў “наогул не чула пра гэта”, заявіла дэмакратычны лідар Святлана Ціханоўская 23 жніўня па выніках сустрэчы са спікерам парламента Літвы Вікторыяй Чмілітэ-Нільсан. 

“Гэта абмяркоўваецца толькі ў Літве, а ў Беларусі ўвогуле не абмяркоўваецца. Мы ніколі не будзем ставіць пад сумнеў цэласнасць Літвы. Вільнюс — гэта літоўскі горад. Я не разумею, навошта наогул пра гэта кажуць, бо гэта толькі азлабляе літоўцаў і беларусаў”, — цытуе палітыка LRT.

На думку Ціханоўскай, спрэчкі на гэтай глебе выгадныя толькі расійскаму і беларускаму рэжымам. На пытанне, што б яна сказала “беларусам, якія вераць у ідэю “літвінізму”, Ціханоўская парэкамендавала, ім “звярнуцца да гісторыкаў”, а не ўступаць у палітычныя дэбаты. 

Каментуючы магчымасць таго, што сейм Літвы ўраўнуе нацыянальныя абмежавальныя меры ў дачыненні да грамадзян Расіі і Беларусі, дэмлідар заявіла, што гэта “выклікае асцярогі”. 

“Я перакананая, што гэта толькі на руку расіянам і прапагандзе [Аляксандра] Лукашэнкі, бо яны робяць усё магчымае, каб стварыць супярэчнасці паміж намі, прадстаўнікамі дэмакратычнай Беларусі, і літоўцамі. Я заўсёды казала, што вельмі важна падзяляць беларусаў і рускіх, таму што мы зусім розныя”, — сказала яна. 

Беларусы, падкрэсліла Ціханоўская, “выступаюць супраць вайны, супраць рэжыму, які ўцягвае <…> краіну ў гэтую вайну”, беларускі народ “не стварае праблем для літоўцаў”. Пры гэтым дэмлідар адзначыла, што рэжым Лукашэнкі, магчыма, “імкнецца даслаць у Літву правакатараў або выведнікаў”.

Гл. таксама:

Прадстаўніца АПК: Узмацненне дыскрымінацыйных і ксенафобскіх меркаванняў у Літве дэматывуе дэмакратычна настроеных беларусаў

Рада БНР: Канфлікты паміж беларусамі і літоўцамі на глебе інтэрпрэтацыі ВКЛ выгадныя пуцінскай Расіі і рэжыму Лукашэнкі