У калядным віншаванні Ціханоўская заклікала працаваць разам дзеля вяртання ў свабодную Беларусь

6 студзеня, Позірк. Раство — дзень, калі людзі знаходзяцца “ў чаканні нечага светлага і дзіўнага, у чаканні цуду”, адзначыла беларускі дэмакратычны лідар Святлана Ціханоўская, віншуючы беларусаў, якія адзначаюць гэтае свята 7 студзеня.

“Але якога цуду чакаюць беларусы сёння? Многія з вас пэўна адкажуць: убачыць і абняць блізкіх, якіх няма побач, вярнуцца дадому і адчуваць сябе ў бяспецы, жыць у свабоднай, квітнеючай краіне, а не шукаць бліжэйшага месца для эміграцыі, атрымліваць за працу дастойную ўзнагароду і ні ў чым не мець патрэбы”, — сказала яна.

На думку палітыка, падобныя жаданні — “не нешта фантастычнае ці чароўнае”, гэта “рэальнасць, якую заслугоўвае кожны з нас”.

“І толькі нам з вамі па сілах гэтую рэальнасць пабудаваць, важна толькі не апускаць рукі, дапамагаць адзін аднаму і працягваць працу дзеля агульнай мэты”, — дадала Ціханоўская з зычэннем беларусам “сіл, смеласці і веры ў сябе, каб увасобіць у жыццё” тое, пра што яны больш за ўсё мараць.

Раство па юліянскім календары, якое прыпадае на 7 студзеня, святкуюць у Рускай праваслаўнай царкве (РПЦ), да якой адносіцца Беларускі экзархат, а таксама ў Іерусалімскай, Грузінскай, Сербскай, Польскай цэрквах.

Праваслаўе ў Беларусі лічыцца дамінуючай хрысціянскай канфесіяй. Руская праваслаўная царква лічыць беларускую зямлю сваёй кананічнай тэрыторыяй. Беларускі экзархат РПЦ ацэньвае колькасць вернікаў у чатыры мільёны. Праваслаўная царква ў Беларусі налічвае 1.733 прыходы ў 15 епархіях, адкрыта 1.848 храмаў, на этапе будаўніцтва — 158.