Міністр турызму Ірана заклікаў да спрашчэння візавага рэжыму з Беларуссю

17 кастрычніка, Позірк. Адмяніць візавыя патрабаванні для арганізаваных турыстычных груп з Ірана і Беларусі, а таксама аднавіць прамыя авіязносіны паміж краінамі заклікаў міністр турызму Эзатала Заргамі 16 кастрычніка, за дзень да прыбыцця ў Мінск першага віцэ-прэзідэнта Ірана Махамада Махбера.

Паводле інфармацыі Tehran Times, іншымі перспектыўнымі напрамкамі супрацоўніцтва міністр назваў правядзенне сумесных выстаў, абмен досведам у галіне рэстаўрацыі, археалогіі і культурнай спадчыны.

Махбер прыбыў у Беларусь з аднадзённым візітам на запрашэнне прэм’ер-міністра Рамана Галоўчанкі, правёў перагаворы з Аляксандрам Лукашэнкам.

У 2024 годзе чакаецца візіт у Беларусь прэзідэнта Ірана Эбрахіма Раісі.

Іран — саюзнік Расіі ў яе агрэсіі супраць Украіны, пастаўшчык беспілотных лятучых апаратаў “Шахед”. Таксама афіцыйны Тэгеран падтрымаў напад на Ізраіль палестынскай групоўкі ХАМАС. Лукашэнка апошнія падзеі на Блізкім Усходзе асабліва не каментуе.