У выніку абвальвання часткі моста праз Нёман пацярпелі тры чалавекі, двое ў рэанімацыі

8 студзеня, Позірк. У выніку абвальвання часткі старога моста праз Нёман каля аграгарадка Беліца Лідскага раёна (Гродзенская вобласць) пацярпелі тры чалавекі, паведамляе Міністэрства аховы здароўя.

У пацярпелых дыягнаставаныя траўмы рознай ступені цяжкасці, у тым ліку чэрапна-мазгавыя, пераломы, пашкоджанні ўнутраных органаў і грудной клеткі.

Адзначаецца, што пасля аказання першаснай медыцынскай дапамогі два чалавекі шпіталізаваныя ў аддзяленне рэанімацыі і інтэнсіўнай тэрапіі Лідскай цэнтральнай раённай бальніцы, трэцяму прызначаны “шэраг дадатковых даследаванняў”.

Паводле дадзеных Міністэрства па надзвычайных сітуацыях, пралёт моста, які абрынуўся 8 студзеня ў 10:23, не выкарыстоўваўся, пацярпелыя праводзілі яго дэмантаж. Сярод іх машыніст экскаватара, які ў выніку надзвычайнага здарэння апынуўся ў вадзе.

28 чэрвеня 2023 года на 8-ым кіламетры дарогі Хальч — Шарсцін — Прысно — Бальшавік (Гомельская вобласць) пад фурай абрынуўся мост, паведамляла УУС Гомельскага аблвыканкама.

У ноч на 8 студзеня 2022 года павалілася пешаходная частка моста над вуліцай Няміга ў Мінску, пабудаванага ў 1962 годзе і адрамантаванага ў 2017-м. Ніхто не пацярпеў. Увосень 2017 года мост быў капітальна адрамантаваны. Выдаткі склалі 3 млн рублёў, што ў той час было эквівалентна 1,5 млн долараў ЗША.

З-за абвальвання сталічнага моста была ўзбуджаная крымінальная справа, у канцы 2022 года за службовую халатнасць на 5 гадоў абмежавання волі без накіравання ў папраўчую ўстанову адкрытага тыпу быў асуджаны намеснік дырэктара дзяржаўнага прадпрыемства “Гораўтамост”.

Да 2020 года будаўніцтва і рамонт аўтадарог у Беларусі ажыццяўляліся шмат у чым за кошт фінансавання еўрапейскіх фондаў і Сусветнага банка. З 2008 года Беларусь атрымала на рэалізацыю інфраструктурных праектаў (уключаючы рэканструкцыю дарог) каля 5,3 млрд еўра.

ЕБРР прыпыніў фінансаванне дзяржпраектаў у Беларусі ў 2020 годзе, а ў 2022-м цалкам закрыў доступ Беларусі да сваіх фінансаў на фоне ўнутрыпалітычнага крызісу ў краіне і падтрымкі Мінскам вайны ва Украіне.

З пачатку сваёй дзейнасці ў Беларусі ў 1992 годзе ЕБРР інвеставаў амаль 2,5 млрд еўра ў больш чым 100 праектаў.

Сыход з Беларусі еўрапейскіх інвестараў не знізіў тэмп рэканструкцыі дарог і мастоў, “нічога не змянілася”, заявіў 8 кастрычніка ў эфіры тэлеканала АНТ міністр транспарту і камунікацый Аляксей Ляхновіч.

Міністр згадаў ануляваны праект, які рэалізоўваўся сумесна з ЕБРР па рэканструкцыі мастоў: “Мы не спыніліся з-за сыходу гэтага еўрапейскага банка ні на адным мосце. Мы працягнулі рэканструкцыю, увялі ў эксплуатацыю чатыры масты, сёлета яшчэ пяць уводзім. У 2024-м плануем завяршыць яшчэ чатыры”.