Ціханоўская: Ніколі пытанне захавання нацыянальнай ідэнтычнасці беларусаў не стаяла так востра

8 студзеня, Позірк. Адкрываць нацыянальную культуру для насельніцтва краін, у якіх пражываюць эмігранты, заклікала дэмакратычны лідар Святлана Ціханоўская на сустрэчы з беларускімі культурнымі дзеячамі 8 студзеня ў Варшаве.

На думку палітыка, развіваць культуру цяжка, калі “Беларусь сыходзіць з міжнароднага парадку дня, а рэжым спрабуе задушыць усё жывое” унутры краіны, бо успрымае ў тым ліку і мастацтва як пагрозу для сябе.

“Магчыма, ніколі раней пытанне захавання нацыянальнай ідэнтычнасці не стаяла так востра”, — лічыць экс-кандыдат у прэзідэнты.

Моцную беларускую нацыянальную ідэнтычнасць яна назвала “найлепшым антыдотам “рускаму свету”.

У 2022 годзе падтрымка беларускай культуры ўпершыню была абвешчана адным з прыярытэтаў Еўрасаюза, дадала Ціханоўская, больш за ўсё сярод яго членаў на нацыянальным узроўні дапамагаюць Швецыя, Германія і Польшча

“Гэтай дапамогі ўсё роўна недастаткова, трэба, каб больш краін уключаліся”, — сказала яна.

“Вельмі часта я чую сярод замежнікаў, што, маўляў, у беларусаў усё замерла, усё знішчана, нічога не адбываецца, і там падтрымліваць няма чаго. Таму трэба даводзіць да нашых замежных сяброў адваротнае”, — падкрэсліла Ціханоўская.