Грамадзянка Беларусі затрымана ў Польшчы паводле падазрэння ў працы на КДБ
9 студзеня, Позірк. Супрацоўнікі органаў унутранай бяспекі Польшчы затрымалі грамадзянку Беларусі, якую падазраюць у шпіянажы ў інтарэсах КДБ. Гэта адбылося яшчэ 20 снежня 2023 года, паведаміў 9 студзеня партал infosecurity24.pl, які падрабязна асвятляе пытанні, звязаныя з дзейнасцю сілавых структур.
Паводле інфармацыі прэс-службы польскай пракуратуры, жанчына цягам трох месяцаў перадавала КДБ інфармацыю пра прадстаўнікоў беларускай дыяспары ў Польшчы і арганізацыі, якія аб’ядноўваюць беларусаў і палякаў беларускага паходжання.
Паведамляецца, што супрацоўнікі Агенцтва ўнутранай бяспекі правялі “вобшук і апытанне сведкаў”. Аперацыя была праведзена ў некалькіх месцах на тэрыторыі Польшчы, сярод іншага канфіскаваныя носьбіты інфармацыі.
Пасля затрымання жанчыну даставілі ў Мазавецкае аддзяленне Упраўлення па барацьбе з арганізаванай злачыннасцю і карупцыяй Нацыянальнай пракуратуры ў Варшаве, дзе ёй выставілі абвінавачанне “ў вядзенні дзейнасці на карысць замежнай выведкі супраць Рэспублікі Польшча”.
Праз апасенні уцёкаў падазронай, тое, што ёй пагражае “суровага пакаранне”, і ў мэтах забеспячэння “належнага ходу разбіральніцтва” пракурор папрасіў суд заключыць яе пад варту. “Суд цалкам пагадзіўся з довадамі пракурора і ўжыў да жанчыны меру стрымання ў выглядзе ўтрымання пад вартай тэрмінам на тры месяцы”, — паведамілі парталу ў пракуратуры.
Гэта не першы выпадак, калі Польшча абвінавачвае грамадзянаў Беларусі ў шпіёнскай дзейнасці.
19 снежня 2023 года Люблінскі акруговы суд прыгаварыў 14 замежнікаў, абвінавачаных у шпіянажы на карысць Расіі, да пазбаўлення волі на тэрмін ад 1 года і 1 месяца да 6 гадоў. Сярод іх трое беларускіх грамадзян.
19 кастрычніка таго ж года ў судзе Познані пачаўся працэс над двума грамадзянамі Беларусі паводле абвінавачання ў шпіянажы ў інтарэсах беларускай ваеннай выведкі.